HUMAN nakatilaw og kastigo ang Miami Heat sa National Basketball Association (NBA) 2014 Finals, misaludo ang ilang lider nga si LeBron James nga mas maayo ang San Antonio Spurs.
Ang Spurs ningmakmak na sab sa Heat, 104-87, kagahapon sa Game 5 aron humanon og sayo ang NBA Finals series, 4-1.
Si James igo na lang midayeg sa Spurs partikyular ang pagka-teamwrok niini.
“That’s how team basketball should be played,” matod ni James. “You know, it’s selfless. Guys move, cut, pass, you’ve got a shot, you take it, but it’s all for the team and it’s never about the individual. That’s the brand of basketball. They were the much better team.”
Dili malalis nga si James maoy labing maayong basketbolista sa kalibutan apan ang four-time NBA Most Valuable Player kuwang lang og suporta sa pagpakigbatok niini sa determinadong Spurs.
Nimugna og 31 puntos ug 10 rebounds si James kagahapon apan ang iyang mga kauban sa Big Three nga sila si Dwyane Wade ug Chris Bosh wala nakaarte og sakto.
Si Bosh igo lang nimugna og 13 puntos samtang si Wade niamot og 12 puntos.
Ang duha ka pointguards sa Heat nga sila si Mario Chalmers ug Norris Cole parehong nagkagidlay hinungdan nga napugos si coach Erik Spoelstra nga ihulip si James sa ilang luna.
“When you’re in a series like this and it’s not going your way, we all get frustrated,” matod ni Spoelstra.
“But L.J. and I communicated the entire game because he had to play the point guard for us. So we were trying to get on the same page about play calls and making sure everybody was organised. We just came up short.”
Apan sa pagpadayon sa duwa, ang teamwork sa Spurs mao ra gihapon ang ningpatigbabaw. (Reuters/ESL)