NALINGAW kong nagbasa sa headline sa Superbalita kagahapon kabahin sa “Legal wife” nga mipapriso sa iyang banang TV host human nasakpang nagkuyog sa uyab. Matod pa sa taho, natanggong karon ang duha samtang gihikay ang kasong concubinage.
Atong nasuta niining maong insidente nga dali rang mapriso ang usa ka bana nga masakpang magkuyog sa iyang uyab. Lahi kini sa sitwasyon sa usa ka senador nga di mapriso dayon bisan og mag-atubang na og kasong plunder.
Buot ipasabot ba nga mas grabi ang salaod nga pagpangabit kay sa mangawat og binilyon gikan sa kaban sa nasud?
Kon masakpang kuyog sa kabit, siguradong priso dayon bisan wa pay kasong nasang-at. Kon senador nga gikiha na og plunder, makapadayon pa og salmot sa mga kalihokan sa Senado.
Gani, atong nakita si Sen. Jinggoy Estrada nga namahid og lapok sa nagpa-imbestigar kaniya nga si DOJ Secretary Leila de Lima atol sa duha ka hearing sa Commission on Appointments.
Lahi sab ang kang Sen. Bong Revilla, nagdiskurso kini nga samag nanamilit na. Iya kining gipakapinan og usa ka music video.
Matod pa sa usa nga nakakita, abi gyud niya og sundon ni Revilla ang gibuhat ni Tyrion Lannister sa salidang “Game of Thrones” nga modemanda og “Trial by combat.”
Haha!
Apan lahi si Panday. Igo man hinuong nagpa-cute nga nagkantakanta. Human niini, namahayag nga modagan siya pagka presidente karong 2016.
Sa laing bahin, si Sen. Juan Ponce Enrile namahayag nga wa siyay kalibotan sa mga gibuhat sa iyang kanhi chief of staff nga si Gigi Reyes.
Ang ako lang masulti, kon igo na man gani ang mga ebidensiya, nganong di pa man maisyuhan og warrant of arrest kining tulo?
WAY LIBERAL?
Gimantala na nga laing senador – si Sen. Gringo Honasan -- ug 10 pa ka mga opisyal ang ikiha og pangurakot. Gihulagway nga sakop sa oposisyon ang tulo ka mga senador nga unang gikiha. Kining si Honasan giingon nga independente.
Alang kanako, kining mga senador nga gikiha mga kaalyado ni Presidente Jojo Binay sa UNA nga kaatbang sa Liberal Party sa piliay sa 2013 ug karong umaabot nga 2016.
Dungan sab kini sa mga pasangil nga gipang-isa batok sa mga sakop sa pamilyang Binay.
Hinuon, dunay usa ka opisyal nga sakop sa LP sa sunod batch ug mao kini si Director General Joel Villanueva sa Technical Education and Skills Development Authority (Tesda). Makapaabot na ko sa mga pasiaw niining maong pakunswelo.
Bisan pa man, di sab ko makadawat sa argumento nga di sad-an ang mga gipangkiha kay dunay bahid sa politika. Kon daghan ang nangawat apan kini lang sila ang nasakpan, nagpasabot ba kini nga wa na silay sala ug di na lang sila angay gukdon?
Alang kanako, angayan silang gukdon sa balaod ma duna bay politika o wala.
Kinahanglang mapriso ang mga sad-an kay kini paagi aron magmatngon na ang uban sa pagpangawat.
Sa pagkakaron, daw dugay ang pagtuyok sa ligid sa hustisya apan ilang ipaguwa nga gidali-dali. Pagka toytoy.
Hinuon, alang kanako, mas maayong tan-awon dayon sa mga imbestigador kon giunsa sa pagwaldas sa maong mga opisyal ang kwarta sa atong panudlanan aron mabunggo ang ilang kabuang.
(Sunda ang @anol_cebu sa Twitter)