NAGBILIN og dakong haw-ang ilabi na sa natad sa ekonomiya kining kalit nga pagtaliwan sa inila ug dakong negusyanti sa Sugbo nga si Richard King.

Si King, tag-iya’g mga dagkong hotel ug restaurant sa Sugbo ug sa ubang dapit sa nasod sama sa Crown Regency, yanong gipusil patay niadtong Huwebes didto sa Davao City nga maoy nakapakugang sa business sector sa Sugbo.

Daghang anggulo ang gitutokan karon sa mga kapulisan kalabot kalabot sa iyang kamatayon.

Dunay nagduda nga kini may kalabotan sa gidiling drugas pero wala usab isalikway ang kabahin sa negusyo.

Posibling aduna usay personal nga kasuko ug gikabingkil si King nga maoy mibuhat sa ingon.

Si King, mao usab ang nanag-iya sa Vital C Health products yano nga gipatay atubangan sa pipila niya ka mga empleyado nga maoy iyang gika-meeting nianang gabhiona.

Ang nakapaintriga og maayo mao nga ang killer wa magtaptap sa iyang nawong dihang iyang gipusil si King.

Buot ipasabot nga nagtuo ang mamumuno nga di siya mailhan tungod kay basin og dili siya taga Davao o kaha kon taga Davao man duna siyay gisaligan.

Ang pag-ila sa mamumuno maoy usa ka krusyal nga misyon sa mga kapulisan tungod kay dako ang posibilidad nga ang mastermind niini usa usab ka impluwensyado nga pagkatawo.

Si King nalambigit sa pagpalusot og pseudoe­phedrine sa Cebu, pila ka tuig ang milabay. Ang pseudoephedrine usa ka ingredients nga isagol sa shabu.

Kadaghan na man tuod ni siya maigo sa nagkalainlaing kontrobersiya apan hinaot nga di kini maoy mahimong babag sa pagpangita og hustisya sa kamatayon ni King.