NAGTUKOD na og team sa mga ahente ang National Bureau of Investigation (NBI) 7 nga maoy moimbestigar sa kamatayon sa Sugbuanong negosyante nga si Richard L. King.

Gawas sa mga awtoridad sa Central Visayas, ang Special Investigation Task Group makig-alayon usab sa kapolisan sa Western Visayas tungod kay aduna usay patigayon ang biktima sa Boracay.

Ang mga King nagtukod og Crown Regency Hotel and Resort sa Boracay.

Si NBI 7 Director Max Salvador nagdumili hinuon pagtug-an kon pila ang mga ahente nga molangkob sa team nga iyang giumol aron dili mabaraw ang ilang imbestigasyon.

Si Sr. Supt. Vicente Danao Jr., hepe sa Davao City Police Office, nibutyag nga dako ang purohan nga dunay kalabotan sa negosyo ang motibo sa krimen base sa iyang pakighinabi sa Buena Mano Balita kagahapon sa buntag.

Matod niya dako ang posibilidad nga dili taga Davao City ang mamumuno gumikan kay wa kini magtaptap sa nawong dihang gihimo ang krimen.

Apan ang kauban niini nga maoy nagmaneho sa motorsiklo nga gisakyan human gipusil-patay ang biktima, ang naka-helmet nga gidudahang sa kapolisan nga taga Davao City.

Si Salvador niingon nga tan-awon sa iyang mga sakop kon duna bay kalambigitan sa patigayon dinhi sa Sugbo ang kamatayon ni King.

Siya nidugang nga hugot sila makig-alayon sa NBI-Davao City nga nag-imbestigar usab sa krimen.

“The NBI in Davao City has already the leads,” sumala ni Salvador. “For NBI 7, we will try to look into all angles here in Cebu if there are possible points to be investigated.”