USA ka travel agency sa dakbayan sa Mandaue gitulis sa duha ka wa mailhing mga lalaki nga mga armado kagahapon sa hapon.

Ang kapulisan adunay nasikop nga usa ka tawo nga nagmotorsiklo sa nahitabong ginukdanay pipila ka minutos human sa tulis.

Si PO1 Christito Raboy sa Mandaue City Police Office nga nahinabi sa Sun.Star Superbalita nibutyag nga ang gitulis pasado ala 1 kagahapon sa hapon sa mao ang 17 Twenty One Travel N’ Shop sa may dalan A.S Fortuna, sa Barangay Banilad.

Duha ka mga tulisan nga wala magtaptap sa nawong ang nagpakaaron-ingnon nga mopalit og ticket sa dihang kalit nga nideklarar og tulis dungan sa pagtion og armas.

Ang upat ka mga kawani nga sila si Jimmy Lumogdang, 36, taga barangay Babag, dakbayan

sa Lapu-Lapu; Lovely Joy Santillan, 22, stay-in worker; Maria Luche Arias, 24, taga Dalaguete, Sugbo; ug Mariza Buenvista, 54, taga barangay Bakilid, dakbayan sa Mandaue, gimandoan sa mga tulisan sa pagpaluhod.

Pagkahuman, gipangdala sila sa pansayan ug gimandoan nga di magsaba ug di mogawas.

Amg mga tulisan daling mikuha sa ilang cash nga P4,900 ug upat ka mga cell phone.

Paglabay sa pipila ka minutos, sa dihang namingaw na, wa na ang mga tulisan ug wa sila makahibawo kon unsay gigamit sa pagsibat.

Apan adunay mga tawo nga nakakita sa paggawas sa duha ka mga tulisan ug ningsibat gamit ang motorisklo.

Daling gialarma ang mga pulis sa dakbayan sa Mandaue.

Ang kapulisan daling nibutang og blocking force sa Brgy. Cabancalan, utlanan sa dakbayan sa Mandaue ug dakbayan sa Sugbo.

Adunay duha ka mga lalaki nga nagsakay og motorisklo nga wala mag-helmet nilikay sa kapulisan ug nipasutoy pagpadagan ang driver padung sa Brgy. Talamban.

Nahitabo ang ginukdanay ug didto na sa may Enrico Hardware sa Barangay Bacayan nasikop ang driver samtang ang angkas nakasibat.

Nakuha gikan sa dinakpan ang usa ka kutsilyo ug way lisensya sa pagmaniho.

Sa pagsuwat ning taho, wa pa nila mapakita sa mga bik­tima ang suspek aron matino kon usa ba kini sa nitulis kanila.

Nasuta sa kapulisan nga way bantay ang establisemento samtang ang close circuit television (CCTV) camera gitangtang sa miaging buwan aron unta ilisan.