NASAKITAN si Kawhi Leonard human miikyas sa kamot sa San Antonio Spurs ang NBA title sa nakalabay nga tuig.

Mao nga karon nga tuig, gipaniguro niyang ipakita ang mas bagtik ug mangtas nga dinuwaan.

Wa niya pakyasa ang kaugalingon, human gipukan ang kanhi two-time defending champion Miami Heat human sila mihari sa best-of-seven series sa 4-1 nga iskor.

Usa si Leonard sa mga rason nga nakuha sa San Antonio ang ikalimang titulo tungod sa dagkong puntos nga iyang gipaambit.

Tungod niini siya ang giila sa NBA isip Finals MVP nga gitunol kaniya sa 11-time champion nga si Bill Russell.

“Right now, it’s just surreal to me. I have a great group of guys behind me.”

Mihatag og 22 puntos ug 10 rebound si Leonard una na-foul out sa Game Five nga gihimo sa San Antonio.

Wa sab makahatag og dautang epekto ang pagbiya niya sa duwa, tungod sakto na sab nga maaswat sa kadaugan ang tim sa iskor nga 104-87 kontra Heat.

Human sa selebrasyon, atubangon sa Spurs ang mga pangutana sa desisyon sa ilang edaran nang members nga sila Tim Duncan, Manu Ginobili ug Tony Parker.