MATANAO, Davao del Sur - Usa ka tinun-an ang gideklarang dead on arrival sa balay tambalanan human kalit lang nakuyapan sulod sa tulunghaan sa lungsod alas 6:30 sa buntag niadtong Lunes.

Si Senior Inps. Elmer Cabuslay, hepe sa Matanao Police Station nag-ila sa tinun-an nga si Louie Asederos, 9, Grade 2 sa Matanao Central Elementary School.

Matud ni Cabuslay nga sayong naabot sa tunghaan si Asederos aron moapil sa flag raising ceremony apan kalit lang nga nahagba sa yuta ang bata.

Dali matud pang nangayo og tabang ang magtutudlo niini sa munisipyo apan way ambulansiya ang magamit niadtong taknaa.

Hinuon, ang patrol car sa kapulisan maoy gisakyan sa biktima kon diin una siyang gihatud sa Sinawilan Hospital, apan gibalhin sab dayon didto sa Davao del Sur Provincial Hospital.

"Pag-abot didto, gideklara (patay) ni Dra. Patricia Dela Cruz," matud ni Cabuslay.

Nasayran sa eksaminasyong medikal sa biktima nga namatay siya sa "cardiac arrest" tungod kay aduna diay sakit sa kasing-kasing.

Nagpadayon pa ang imbestigasyon sa kapulisan kalabot sa maong insidente. (Orlando B. Dinoy)