SUKAD niadtong nag-usa sila og puwersa, 12 na ka mga tuig ang nakalabay, gipadaplin na nila ni Tim Duncan, Manu Ginobili, ug Tony Parker ang ilang kaugalingong garbo aron magtutok sa usa ka tahas-- manghakot og kampiyunato.

Tuod man, nagbunga ang sakripisyo sa Big Three sa San Antonio Spurs ug niadto lang Lunes (RP time), nalangkat nila ang ikaupat nilang titulo sa National Basketball Association (NBA) nga sila nag-uban.

Sa kinatibuk-an, ang Spurs aduna na’y lima ka mga titulo. Sila ra si Duncan ug coach Gregg Popovich ang naa sa matag selebrasyon.

“It’s very unique. I don’t think it’s happened to many teams in history where three players have played together for so long and in a successful manner like this where no one is egotistical and trying to demand things,” matod ni Ginobili.

Sa kasaysayan sa NBA, ang panag-uban nila mao ang winningest trio sa playoffs diin nakahakot na sila og 117 ka mga daog.

“They’ve gotten over themselves. [That] is what we always talk about,” asoy ni coach Popovich. “It’s absolutely not about any one of them, and they know that. If you have three people on your team that lead the way in that manner, it’s to be enjoyed on a daily basis. So that’s probably the first thing I’ve enjoyed about them. It makes my job so much easier.”

Si Duncan nag-edad na og 38 samtang 36 si Ginobili. Adunay poruhan nga dili na sila moduwa sa sunod nga season. Apan sa kalawom sa puwersa sa Spurs, dako ang posibilidad nga kompleto gihapon ang Big Three sa pag-agak sa Spurs ngadto sa ikaunom niining titulo.

Dili na kinahanglang mokayod og taman sila si Duncan ug Ginobili gumikan kay tanang magduduwa nga bunluton ni coach Popovich puwede gyung masaligan hilabi na si Kawhi Leonard, ang 2014 Finals MVP.

Si Duncan, kinsa katulo na nahimong Finals MVP, nagkanayon nga undanon ang playoffs ning higayuna alang kaniya.

Naposte niya ang iyang ika-158 double-double sa playoff diin iyang nabuak ang rekord ni legendary Magic Johnson.

Nalabwan sab niya si Kareem Abdul-Jabbar sa most all-time career playoff minutes.

“I can appreciate you saying the names and having passed them in anything,” batbat ni Duncan kabahin sa iyang naabot. “It is an honor to be in that position. But the focus is on winning one more and once that is done I can look back and say ‘Hey, that’s truly an honor.’”

Si Parker nag-edad og 32 apan eksplosibo gihapon kini. Nagsugod siya’g duwa sa Spurs sa edad nga 19. (AFP/ESL)