GISUGDAN na sa pagpanday ang sulod sa Busay Sport Complex aron himuon nga temporaryong eskwelahan hulip sa gipaabandonar nga Busay Elementary School gumikan sa kadelikado sa

lugar.

Nagsugod na usab og klase ang mga magtutudlo ug tinun-an sa Sapangdaku Elementary School, kansang eskwelahan gipabiyaan ni Mayor Michael Rama sa miaging semana.

Si Rama uban ang mga tigbalita nga nadestino sa Cebu City Hall ningsusi sa duha ka mga eskwelahan aron sayran ang kahimtang sa mga estudyante.

Gihulagway sa mayor nga pulos makaluluoy ang kahimtang sa duha ka mga tunghaan, apan mas nakapabor ang Sapangdaku sanglit nakasugod na sila og klase didto sa ilang barangay hall samtang ang Busay wa pa mahuman ang pagbutang og partition sa gym.

Ang barangay hall sa Sapangdaku nagkinahanglan og husto nga lutsanan sa hangin aron di alimut-an ang mga tinun-an hilabi na sa panahon sa ting-init diin ang klase bahinon sa duha ka mga shift aron makaeskwela ang tanang mga bata.