GIWITKAN ni Mayor Oscar Moreno ang mga mayorya sa konseho atol sa iyang mensahe sa kasualoganCharter Day sa siyudad sa Cagayan de Oro niadtong Domingo.
Adunay programa nga gihimo sa Kiosko Kagawasan ning siyudad nga gipangulohan ni Moreno diin anaa usab ang espesyal nga presensya ni Senator Koko Pimentel.
Apil sa misaulog ang kadagkoan sa nagkalain laing ahensya uban sa pipila lamang ka mga konsehal diin sagad mao ang mga minorya.
Parte sa speech ni Moreno mao ang pagbatbat niini sa kinatibuk-an nga kalamboan nga nahimo niini sa iyang pagsilbi sa siyudad. Gikan sa pagpahapsay sa kadalanan, pagtukod og mga bag-ong mga lawak sa nagkadaiyang tunghaan , pagpanindot sa mga parke sa siyudad, pagpang-apod apod sa mga philhealth cards ug accredited sa mokabat 54 ka mga health center, pagpalambo sa ospital, pagpang-apod apod sa luna ug uban pa ang usa sa gipaabot ni Moreno sa katawhan sa siyudad.
Nihangyo kini sa mga kadagkoan sa barangay nga unta magmalampuson siya sa iyang mga programa.
Apan gibutyag niini sa iyang mensahe nga ang mga majority kon mayorya sa konseho nga maoy gababag sa iyang mga plano alang sa pagpalambo sa siyudad ang dili na niya matugotan pa tungod kay dili makatarunganon nga gaubsan ang iyang mga budget alang sa mga programa ug proyekto.
Gani gi-share niini nga nasakit siya dihang daw si Bise Mayor Ian Acenas ang mibalibad sa usa ka investor tungod kay gibutyag niining dili sila in good terms sa mayor.
Daw girekomenda hinuon ni Acenas ini ang gobernador sa probinsya.
Giingong usa kini ka iresponsableng pahayag gikan sa usa ka Bise Mayor ug gibutyag ni Moreno nga naulawan siya nga nangayo na lamang og despensa sa maong investor.
Gibutyag niini nga kung kaniadto misumiter siya og P2.6 bilyon nga budget nga gi-slash sa mayorya og P2.3 bilyon lamang alang sa sunod tuig mosumiter siya og agresibo nga budget nga mobalor og 3.8 bilyon aron makapalambo sa mga proyekto ug programa.
Dugang niini nga serbisyo ang iyang gikinahanglan sa mayorya ug dili kontra sa pulitika. (SVB)