MOKABAT sa P3.5 milyones nga kantidad sa gituohang shabu ang nasakmit atol sa gipahiga­yong buy bust operation sa mga sakop sa Cebu City Anti Illegal Drugs Special Operation Task Group sa Cebu City Police Office (CCPO) sa sit­yo CRCI, Barangay Apas, dakbayan sa Sugbo.

Ang suspek niingon nga gibilin kaniya ang shabu ug una pa niyang higayon nga mobaligya sa ginadiling drugas.

Si Senior Insp. Leonil Avergonzado, pangulo sa CAIDSOTG, maoy nangulo sa operation kagahapon sa hapon, diin nasikop sila si Alcher Baynas, 29, lumolopyo sa maong dapit, subject sa buy bust operation, ug higala niining si Don Tan, 39, taga barangay Talamban.

Nakuha gikan sa gamay nga lawak ni Baynas ang onse ka dagkong plastic ug laing siyam ka medium size nga plastic nga ang sulod gituohang shabu.

Gibana-bana sa kapulisan nga mokabat sa P3.5 million ang balor sa higayon nga kini mabaligya na.

Sa interview sa Sun.Star Superbalita, giangkon ni Baynas nga gikan kaniya ang drugas nga nakuha sa kapulisan.

Apan matod niya nga igo lang siyang gisugo sa paghupot ug ipahatod kini ngadto sa Talamban.

Dugang ni Baynas nga di siya motug-an sa kapolisan kon kinsa ang nagbilin kaniya sa maong mga drugas kay di sab siya gusto nga mamiligro ang kinabuhi sa iyang pamilya.

Si Tan, sa iyang bahin, niingon nga igo lang siya nga niadto kang Baynas aron pagpani­ngil sa utang ug wa siyay kalabotan sa maong pagbaligya sa shabu.

Ang inahan ni Alcher nga si Nida dihang niabot naghilak nga nakigsulti sa iyang anak.

Matod niya nga iya nang gibadlong ang iyang anak sa maong kalihukan apan wa mopatuo.

Si CCPO Director, Senior Supt. Noli Romana nga niadto sab sa maong dapit, mibutyag nga base sa ilang pakisusi, level 2 drug pusher si Baynas.

Matod niya nga ta­ud­taud na silang nakadawat sa report labot sa kalihukan sa suspek ug sa dihang nahimong positibo human sa ilang pagpaniid, nipahigayon silag operation.

Nagkanayon si Romana nga ila pa usab nga sutaon kon diin gikan ang maong drugas nga kuyaw kon na nabaligya pa, daghang mga kinabuhi ang madaot.

Lakip sa nakuha gikan kang Baynas ang kapin sa P5,000 nga gituohang iyang halin sa drugas ug .38 kalibre nga armas nga adunay mga bala.

Matod niya nga alang kini sa pagdepensa sa iyang kaugalingon, ingon man ang buy bust money nga P2,000.

Midugang si Romana nga kini maoy labing dako nga nakuha nilang operation sa ginadiling drugas sa pagkakaron.

Gihangop niya ang katawhan nga misalig na kanila pinaagi sa paghatag og kasayuran labot sa illegal nga kalihukan sa ilang palibot.