ADUNA nay mga rolling store sa National Food Authority (NFA) sa 37 ka mga barangay ning siyudad sa Cagayan de Oro.
Kini ang gibutyag ni Dr. Rafael Marasigan, Provincial Manager sa NFA Northern Mindanao. Gibutyag niini nga kini aron pakigbatokan ang supply sa commercial rice human miingon nga migamay ang supply sa NFA rice sa probinsya ug aron ipakita nga daghan ug igo ang supply sa bugas sa tibuok rehiyon. Gipasabot niini nga ang rolling store usa ka tindahan nga adunay sulod NFA rice diin sayon lamang kaayong mapalit sa katawhan ug unay sa mga residente sa barangay nga mapalit kini.
Giingong tabang usab sa mga kabus nga mga residente nga maglisod og palit sa kamahal sa commercial rice.
Dinhi sa siyudad sa Cagayan de Oro adunay mokabat 37 ka mga rolling store, 67 sa nagkadaiyang lungsod sa probinsya sa Misamis Oriental samtang adunay 22 nga gidugang sa kalungsoran sa probinsya sa Bukidnon nga gisugdan naidtong Hunyo 9.
Matud ni Marasigan nga kasagaran nga modala sa rolling store kadtong mga miyembro sa Pamilyang Pantawid Pilipino Program kon 4Ps apan adunay mga rekisisitos ug rekomendasyon gikan sa Department of Social Welfare and Development (DSWD).
Gipasabot niini nga dinhi sa siyudad adunay mga major outlet sa NFA rice sama sa 5 ka outlet sa merkado sa Cogon, 6 sa merkado sa Carmen, 3 sa merkado sa Bugo ug 4 sa merkado sa Agora.
Gipanawagan lamang ni Marasigan ang katawhan nga ang NFA Rice igo kaayo ang supply ug mapalit lang kini sa tag P32 matag kilo. Gidugang niini nga kung hisgotan ang commercial rice sa rehiyon igo usab ang supply niini tungod kay basi sa ilang binulan nga monitoring adunay insaktong supply ang siyudad ug ang tibuok rehiyon.