ATONG gihangop kining pagbutyag ni acting Regional Intelligence Division chief sa Police Regional Office–7 Supt. Pablo Labra II nga aduna silay nadiskobrehan nga listahan sa mga drug pushers ug ingon man mga pulis nga ubos og ranggo ang posibling protectors ni Owen Rosales.

Si Rosales, kanhi pulis, uban sa laing lima mga kauban, ang napatay sa mga tinugyanan sa balaod atol sa shootout didto sa usa ka beach resort sa Bien Unido, Bohol niadtong Hunyo 8.

Siya giingon nga maoy numero unong drug personality sa Bohol ug maoy gitumbok nga mibanhig patay sa hepe sa Ubay, Police station nga si Chief Insp. George Cana niadtong Hunyo 7.

Matod ni Labra nga pinaagi sa cellular phones nga ilang nakuha gikan ni Rosales ug sa kaubanan niini dugang inpormasyon nga magsuporta sa ilang imbestigasyon ang ila unyang mahuptan batok sa maong mga pulis.

Ilang ilhon ilabi na ang mga codenames o mga alyas sa maong mga pulis nga nagbasehan sa Bohol ug dakbayan sa Sugbo.

Sa niaging pipila usab ka semana, mga barangay kapitan sa Cebu City ang mipadayag usab sa ilang reklamo nga adunay mga pulis sa Talamban Police Station nga nagprotehir usab og mga drug lords ilabi na sa bukirang bahin nga barangay.

Sa gihapon, mga ubos og ranggo nga mga pulis ang gipangtumbok ug gipasabot sa mga kapitan.

Hinaot nga seryusohon ug palawman sa mga kadagkuan ang ilang imbestigasyon kalabot niadtong mga pulis nga kaabin sa mga tigpayuhot og drugas.

Ilakip usab unta sa imbestigasyon kon wa bay mga dagkong opisyal nga nalambigit usab sa susamang salaod.

Kinsay nasayod nga gihimong collector sa mga opisyal kining mga low-ranking policemen aron pagprotehir sa ilang imahe?