KANHI sundalo wala maka-survive sa ikaduhang pagpang-ambush human gipauwanag mga bala sa duha ka lalaking nagsakay sa motorsiklo niadtong Martes sa alas 9:00 sa gabii sa may Barangay Lawaan 1, dakbayan sa Talisay.
Si Roman Hermosada, 68, kanhi sakop sa Armadong kusog sa nasud, minyo nagpuyo sa nahisgutang lugar wala namatay dihang gidala sa Talisay City District Hospital human natusaktusak sa mga bala ang iyang kalawasan.
Si Hermosada, gikatahong misuway pa unta sa pagbunot sa gidala niyang kalibre .45, pero wala makapabuto human na-unhan sa mamumuno nga nagdalag KG-9 sub-machine pistol nga girakrak ngadto kaniya.
Si SPO1 Mikie Espina, imbestigador sa Talisay Police Station, nibutyag nga ang biktima gikan sa Tabunok Public Market, namalit og mga makaon dihang nisakay sa traysikol padulong mopa-uli sa ilahang panimalay.
Ang biktima sa front set milingkod sa traysikol nga gipakyaw nga gimaniho ni Leo Delima, apan wala pa makaabot sa panimalay niini kalit nga dunay motorsiklo nga mibutho ug ang angkas maoy nikanaog ug mirakrakrak sa biktima.
Human sa pagpamusil ang mga suspetsado paspas nga nisibat sakay sa motorsiklo samtang ang biktima gidala sa Personnel sa Talisay Emergency and Rescue Assistance Team (TREAT) Talisay District Hospital.
Si Espina, miingon nga gisubay nila ang angulo nga land dispute maoy motibo sa krimen diin gikabangi sa biktima ang igsoon niining si Simplicio, diin nagkihaay sila sa luna nga kabilin sa ilahang ginikanan.
Ang kampo nila ni Simplicio, mireklamo sab sa buhatan sa Talisay Police tungod sa pagpanghulga, samtang misang-at sab og kasong civil ang biktima batok sa iyang igsoon diin nalakip na ang ilaang tagsa-tagsa ka pamilya.