MISS Sinulog Idol, ang namatay human kini madasmagi sa multicab samtang gahuwat ug PUJ dapin sa dalan, laing nag-motorsiklo ang natapsingan.
Kini nahitabo sa dalan C. Padilla, dakbayan sa Sugbo pasado alas ang takna sa milabayng gabii.
Ang namatay mao si Sheila Mae Bucog, 18, taga Barangay Inayawan. Si Bucog nahimong runner-up sa milabayng Sinulog Idol 2014.
Ang nakadasmag mao si Allan Villarin, 37, taga dalan C. Padilla, Barangay Duljo.
Lakip sa na-angol mao si Leobena Carpentero Marine, 25, taga Mambaling ug back rider sa motorsiklo nga gimaniho sa iyang amahan.
Sa imbestigasyon ni PO2 Wilfredo Caperida sa Traffic Division nabutyag nga nagdagan ang multicab nga may plate number 9D-9198 gimaniho ni Villarin paingon na unta mopauli gikan sa trabaho.
Apan kalit lang nga wa niya ma-control ang sakyanan samtang nagsunod kini sa PUJ ug didto kini paingon sa daplin sa dalan ug naigo ang biktima nga nagbarug.
Atol sa maong hitabo, unang naigo si Marine nga natapsingan sa iyang batiis ug didto dayon paingon ang multicab ni Bucog.
Human maigo ang biktima, nabunal kini sa dalan ug ang multicab nabangga ug mipilit sa poste sa Veco daplin sa dalan.
Ang drayber atol sa maong hitabo, igo lang naka-angkon ug bun-og sa iyang kalawasan.
Si Villarin nga nahinabi sa Sun.Star Superbalita miingon nga may igong gikusgon ang iyang dagan kay mingaw ang dalan atol sa maong hitabo, kalit nga dihay mihunong nga PUJ hinungdan nga iyang gitamakan ang brake.
Apan wa dayon maka-kupot ang brake hinungdan nga iyang gilihayan ang PUJ ug dito siya paingon sa daplin, misaka kini sa gutter hinungdan sa pagkaigo sa mga biktima.
Si Bucog wa na madala pa sa tambalanan human kini namatay sa dapit nga nahitabo-an, samtang ang na-angol nga nadala sa tambalanan luwas na gikan sa delikado nga kahimtang.