KIDAPAWAN CITY -- Anaa karon sa talandugong kahimtang ang usa ka ulitawo human nahug sa lubi alas 9:00 sa buntag niadtong Martes didto sa probinsiya sa Cotabato.

Giila ang biktima nga mao si Norodin Alba Idris, 24, molupyo sa Sitio Galay,Barangay Kibayao, Carmen.

Gibutyag sa uyoan sa biktima nga si Jayson Hasan nga mikatkat og lubi ang ulitawo kilid sa ilang bay aron manguha og butong.

Apan sa diha nga tua na si Idris sa taas sa lubi, kalit lang nanghawoy ang kamot niini ug nahug diretso sa atop sa ilang bay.

Nakaangkon og daghang bun-og sa nagkadaiyang bahin sa lawas ang biktima ug napahak pa ang lubot niini nga nasamad sa sin nga atop.

Dali nga gisapupo ang ulitawo ug gidala dayon sa USM Hospital sa Kabacan diin anaa siya sa talandugong kahimtang.

Gikanayon ni Hasan nga iya na nga gipasidan-an ang iyang pag-umangkon nga sungkiton ang butong apan iya gyud ning gikatkat hinungdan nga nahug. (Edgar Fuerzas)