NAPIKON si Atty. Gloria Dalawampu sa iyang gihulagway nga delaying tactics nga gihimo sa abogado sa mga Highway Patrol Group-7 personnel nga gipasanginlang nalambigit sa kamatayon ni Atty. Noel Archival.
Si Dalawampu, maoy nanlaban alang sa nabiyaang pamilya ni Archival.
Niining bag-o, ang abogado sa mga suspetsadong pulis nga si Atty. Innocencio dela Cerna niduso og manifestation ug urgent motion ngadto kang acting Provincial Prosecutor Jesus Tagaan sa Lapu-Lapu City Prosecutor’s Office aron di una sugdan ang preliminary investigation sa mga kaso.
Kini samtang wala pa’y desisyon ang Department of Justice (DOJ) Manila sa ilang motion for reconsideration, nunot sa pagbasura sa ahensiya sa una na nilang request for inhibition sa mga piskal sa Sugbo ug adto ipahigayon sa kauluhan ang preliminary investigation.
Ang mga kliyente ni dela Cerna, pinanguluhan sa hepe sa HPG 7 nga si Supt. Romualdo Iglesia, nag-atubang ug mga reklamong multiple murder ug frustrated murder gumikan sa giingong kalambigitan sa kamatayon ni Atty. Archival niadtong Pebrero 18.
Matod ni Dalawampu, nagtinalawan ang depensa sa ilang gihimo nga paglangay-langay sa proseso. Naglibog na gani siya kung unsa gyud ang gustong mahitabo sa ilang kaatbang.
u201dKung magsige sila’g ingun ana, makalagot na na kay they are delaying the case. If they are really innocent, why are they afraid to face the evidence that we have against them?” sigun ni Dalawampu.
Gipadayag sa manlalaban nga mas maayong mo-plead guilty nalang sa kaso ang mga sinumbong kung itandi sa pagsige’g file og motion nga matod pa, walay igong basehanan.
Naglungot-lungot si Dalawampu sa tinguha sa depensa nga ibalhin ang venue sa preliminary investigation ngadto sa kauluhan o sa bisan asang dapit sa nasud, gawas sa Sugbo, sanglit alang niya, wala man kini igong basehanan.
Gihimug-atan ni Dalawampu nga mas gamhanan pa ang mga pulis-opisyal nga suspetsado sa kamatayon ni Archival sanglit armado ug impluwensiyado sila kung itandi kang konsehal Nestor Archival, kinsa igsuon sa biktima.
Nagduda ang manlalaban nga dunay laing plano ang iyang mga kaatbang hinungdan nga gusto gyud nila nga adto sa kaulohan ipahigayon ang preliminary investigation bisan kun gi deny na sa DOJ ang ilang tinguha nga pagpabalhin sa kaso.
Nibahad si Dalawampu nga pasakaan ug administrative charges si Atty. Dela Cerna kung mahitabo nga painhibiton na usab niini ang bag-ong piskal nga maoy gitahasan sa Regional State Prosecutor nga mohusay sa reklamo. AZDL