NAGTUO ang mga vendor sa Carbon Market nga gitagoan sa mga importer ang ilang kinompra nga ahos pinaagi sa pagtan-og sa ilang mga bodega ug gipalutaw nga way igong suplay sa merkado.

Kini ang pagtuo ni Arnulfo Leopardas, tagdumala sa DK Vegetables sa Carbon Market sanglit base sa ilang namonitor nga balita sa Manila diin sila nagkuha og suplay, minilyon ka kilong ahos ang niabot sa Pilipinas niadtong Enero ug wa pay labot sa nagsunod nga mga buwan.

Gumikan sa kakuwang, nisulbong ang presyo sa ahos nga niabot na og tag P280 ngadto sa

P300 matag kilo nga niresulta sa hinay nga halin.

“Karon kaning imported nga ahos ang nagpamahal ani kadtong mga importer. Suma sa balita pila ka million ang nisud gikan sa January. Wa pay labot ang February ug march. Asa man to?,” pag­hulagway ni Leopardas.

Gitug-an niya nga di madaot ang mga ahos kon isulod sa mga air-conditioned van bisan moabot pa og unom ka buwan nga pagtan-og aron mapatuo ang publiko nga wa nay suplay.

Gipasabot niya nga niadto, tag P60 ngadto sa P80 kilos ang puhonan sa mga importer ug karon niabot na og kapin P200 ang ilang kumpra.

Gipahibawo ni Leopardas nga niadtong Hunyo sa niaging tuig sa samang buwan, tag P40 ra ang kilo sa ahos ug niabot og P80 niadtong Enero.

Sukad niadto hinayhinay nang nisaka ang presyo hangtod niabot sa labing mahal nga tag P300 matag kilo.

Si Ivan Ando, usa ka vendor, niingon nga hinay ang palit sa ilang ba­ligya nga ahos.

Ang konsumidor nga nagpatago sa ngan nga Lola Inday niingon nga nangita sila og paagi nga makadaginot sa ahos taliwa sa kamahal.

“Pwerting mahala, tag­sa ra kabuok. Tagsa na lang ka lusok (ang gipalit) gi­kan sa tulo kay pwerti mang mahala,” pasabot niya.

Si Leopardas niabiso sa mga kustomer nga adunay posibilidad nga mosaka sab ang presyo sa bombay sa sunod nga mga adlaw ug nagmahal sab ang presyo sa luy-a sanglit ang Kanlaon City ra ang nagduso kanila og produkto.