LAIN na usab nga ahente ug driver sa van ang gitulis ug gipriso human nasakiyo sa mga tulisan ang P25,000 cash niadtong Martes sa alas 10:30 sa buntag sa may Barangay Don Gregorio Antigua, Borbon, amihanang Sugbo.
Mga biktima giila nga sila si Cado Dolaunta, 29, ulitawo, sales agent sa Philip Morris and Fortune Tobacco Company (PMFTC)nga nakabasi sa dakbayan sa Mandaue ug driver nga si Reynato Alcantara, taga Barangay Tabunok, dakbayan sa Talisay.
Si Insp. Glen Devocion, hepe sa Borbon Police nga nahinabi sa dySS Super
Radyo/Sun.Star Superbalita nagkanayon nga ang duha ka mga tulisan sakay sa kolor itom nga XRM nga way plaka.
Nag-conference sila sa iyang mga sakop dihang nakadawat siya og tawag gikan kang Margarito Ornopia, kawani sa munisipyo, nga dunay pagpanulis.
Ilang gisuhid ang lugar, ingon man nangayog abag sa mga silinganang police station sa pagpahigayon og road block batok sa mga tulisan nga giingong padulong sa dakbayan sa Bogo.
Si Dolaunta nisulti kanila nga samtang nag-deliver sila og mga sigarilyo, adunay duha ka mga lalaking nagsakay sa motorsiklo nga wa magtaptap sa nawong, nag t-shirt sa kolor puti, samtang ang usa itom nga t-shirt nga may hood.
Gibana-banang nagpangidaron og 20 anyos ang duha apan way nakaila sa mga residente sa lugar.
Human sila maka-transact sa “Tibong’s Store”, usa sa mga tulisan maoy niti-og armas kang Dolaunta, mideklarar gilayon og hold –up ug gikuha ang kwarta.
“Silang duha gipaadto sa likod sa van. Gipasulod ug gisirad-an dayon misibat ang mga suspek! Mga tawo sa lugar maoy nitabang sa mga biktima pagpagawas,” dugang ni Devocion.
Wa nila isalikway ang posiblidad nga inside job ang pagpanulis kay sa wa pa mobiya ang mga tulisan, nangreklamo pa nganong P25,000 ra ang kwarta nga wa pa man unta sila makadeposito sa kwarta sa banko.
Nagtuo si Devocion nga di taga Borbon ang mga tulisan kay wa magtaptap sa pagpanulis bisan kon dunay mga tawo sa dapit.