ANG kanhi Pilipinas Got Talent (PGT) finalist Rolando 'Dodong' Permangil ang giilang winner sa 4th Season sa Papa's Got Talent nga gihatud sa NCCC Hardwaremaxx, last Father's Day, Hunyo 15, sa NCCC Mall Activity Center, Maa ning siyudad.
Gipildi ni Permangil ang laing 14 pa ka mga partisipante nga amahan, sa rendition niya sa 'Kahit Isang Saglit' ni Martin Nievera.
Makatindog balahibo ang pag-awit ni Permangil, ubanan pa sa emosyon nga maoy tatak na niya sa matag kompetisyon nga iyang salmutan.
Angkon sa 39-anyos nga amahan sa upat ka bagets, nga human sa stint niya sa PGT, mibalik siya sa dakbayan aron ipadayon ang pagkanta.
"Bale three months ra man tong contract nako sa PGT after adto balik na pud ko sa pagkanta, at least makatabang ko sa akong pamilya. Naa koy gipa-eskwela karon," ni Permangil nga kasamtangang nag-trabaho isip singer ni Konsehal Bernie Al-ag, sa ikatulong distrito dinhi.
"Naga-uban ko sa activities ni konsehal sa mga barangay, nagakanta-kanta ko," dugang niya.
Alang sab ni Permangil, paigo na ang iyang exposure human miapil sa PGT.
"Tama na siguro to nga nailhan ko sa tibuok Pilipinas, nailhan ko na finalist ko ug nakita nila akong talent."
Giila sab nga 2nd runner-up ang 46-anyos nga amahan from Buhangin nga si Ernie Ayuba.
Gipalakpakan og taman ang version ni Papa Ernie sa 'I Can't Stop Loving You.'
First runner-up sab si Amid Vicente Zablan, 44, gikan sa Mintal nga mibirit sa 'This the Moment' apan mipakita sab sa iyang magic tricks ug dance moves.
Ang 15 ka partisipante gihukman subay sa overall performance (20%); audience impact (10%); stage performance (40%); ug originality (30%).
Mga hurado gilangkuban nila, Juliet Bahala, Star of Davao Season 4 Grand Champion ug kanhi MYMP vocalits ug kasamtangang voice coach sa Muzicskool dinhi; Edzor Milan usa ka freelance band vocalist; Randy Dejanio, NCCC Hardwaremaxx Supervisor (Maa Branch); ug kining tigsuwat.
Big prizes sab ang gitunol ngadto sa mga winners, ang 2nd runner-up, midawat kini og P500 nga cash uban ang 1,000 worth sa gift certificate ug gift pack; ang 1st runner-up midawat og P 1,500 nga cash, 2,000 worth sa gift certificates ug gift pack; samtang ang grand champion dunay P5,000 cash, 10,000 nga kantidad sa gift certificates ug gift pack.
Luyo sa aktibidad, gihimo sab ang Sale, Car Exhibit, Motorcycle Selling, libre nga Haircut, Massage, Eye Check-up and daghan pa.
To all the Daddies, Papa ug Tatay nga nahimong kabahin sa programa, congratulations!
Winner man o dili, still ang inyong pagka-amahan, di kabayran og unsa mang kantidad o pag-ila.