NANGAYO'G despensa si Davao City Police Office (DCPO) Director Vicente Danao Jr. human niya gipangasab-an ug gipagawas sa iyang opisina ang tulo ka mga sakop sa print media niadtong Lunes sa buntag.

Ang pagpangayo og pasaylo ni Danao nahitabo sa dihang gihinabi siya sa programang "Punto por Punto" sa dxAB Radyo Patrol niadtong Miyerkules sa gabii.

Si Danao giingong nangasaba kanila ni Sun.Star Davao reporter Ivy C. Tejano, Mindanao Times reporter Ma. Cecilia Badian, ug si Armando Fenequito Jr. sa The Edge Davao, ug nagpagawas kanila sa iyang buhatan.

Kahinumdoman nga ang mga nahisgutang reporter mokuha lamang unta sa bahin ni Danao labot sa progress sa kaso sa pagpusil-patay sa negusyanteng si Richard Lim King niadtong Lunes sa buntag.

Apan nasuko ang opisyal ug giingong nangasaba ug nagpagawas sa mga nahisgutan kay iyang nasayran nga nigawas na diay sa Mindanao Times ang giingong "person of interest" nga giimbestigahan sa kapulisan sa kaso ni King, nga gisulat mismo ni Badian.

Sumala pa nga gipapalong pa ni Danao ang pag-rekord na unta sa mga reporter sa pagkuha sa iyang bahin ug namulong nga, "Kayo na lang magpulis... huwag niyo akong kausapin, wala pa akong tulog."

"It is the lapses man gyud sa akong mga tao. Actually, lapses ni sa akong tropa, dili media akong gikasab-an ani. Akong tropa, mangayo lang ko'g despensa sa panghitabo," sulti ni Danao atol sa paghinabi kaniya sa dxAB Radyo Patrol.

Human migawas sa editorial sa Sun.Star Davao niadtong Miyerkules ang hitabo nga giulohang, "A uniform doesn't a gentleman make," mitubag dayon ang director.

Miyerkules sa buntag, gusto sa AFP-PNP Press Corps nga mabalik ang maayong relasyon sa DCPO ngadto sa media butang nga nangayo'g pasaylo si Danao.

"Give my sincerest apology nang panghitabo, it so happen pod nga it happened in a very challenging times sa atoang panahon diri sa siyudad sa Davao," pung ni Danao.

"Personally, I'm apologizing sa panghitabo, pasensiya namo, Day, unsaon man nato na nga nahitabo man gyud in the very challenging times pa gyud," panapos ni Danao.

Ang insidente unang nahitabo sa kasaysayan sa DCPO sa dakbayan nga usa ka director ang nangayo'g pasaylo sa iyang nahimong di maayong pamatasan ngadto sa media.