NAGPROTESTA ang mga drayber sa mga jeepney kagahapon batok sa pagsaka sa multa sa mga traffic violation. Nagmartsa sila gikan sa Fuente Osmeña padung sa buhatan sa Land Transportation Office (LTO) 7 ug sa Cebu City Integrated Traffic Operations Management (Citom).

Nipasalig sila nga way trans­port strike. Sa ato pa, wa sila magwelga. Pero wa sila mag-drive kay nagmartsa ug nagprotesta man sila.

Pero ang epekto pareho da gihapon sa welga ang mga drayber. Daghang mga sama natong kabus nga sumasakay nga wang kasakay kay unsa man sakyan nga wa may sakyanan nga nanagan.

***

Ang mga sakop sa Pagkakaisa ng mga Samahan nga mga Tsuper at Opereytor (Piston)-Cebu niprotesta niining pagsaka sa multahan nga gikan sa usa ka libo ka pesos ngadto sa usa ka milyon ka pesos nga ipahamtang sa mga drayber ug sa mga operator sa mga jeep depasaheroan.

Daghang mga drayber nisulti nako nga sala man gyud sa drayber ang paglapas sa lagda sa trapiko.

Daghan sab sa mga drayber nga  wa magtagad sa ilang mga traffic citations nga nadawat mao nga nagtipun-og ang ilang balayranan didto sa Citom.

***

Ang mando sa pagpaumento sa mga multahan nagagikan sa Department of Transportation and Communications (DOTC) pinaagi sa Joint Administrative Order 2014-01, ang Revised Schedule of Fines and Penalties for Violations of Laws, Rules and Regulations Governing Land Transportation nga gipatuman sugod kagahapon.

Nireklamo ang mga drayber kay kon madakpan sila, wa silay ikalukat sa ilang lisensiya kay di na nila maabot ang usa ka libo nga multa.

Tingali nahunahunaan kini sa DOTC aron mag-amping na ang mga drayber kay wa man sila ikamulta.

***

Si Greg Perez, coordinator sa Piston-Cebu, niingon nga di na ni pagdisiplina sa drayber kon di panguwarta na sa maong ahensya sa gobyerno.

Gawas sa pagpaumento sa multa, suspensuhon pa ang lisensya sa drayber gikan sa usa ka semana hangtod sa pagsuspenso ug pagrebokar sa rehistrasyon sa sakyanan.

Mao ni ang ilang gikalisangan. Pero kon mag-amping lang gyud ang drayber ug motuman sa mga balaod ug lagda sa trapiko, di man sila madakop ug mamultahan. Gawas lang kon pareglahan sila sa mga mananakop.

Ang Citom ra ba karon mokiha na niadtong makalapas sa balaod sa trapiko. Unya ang kiha gibaliwa lang sa ubang mga drayber maong nalutsahan na hinuon silag bench warrant sa hukmanan.