HUMAN sa subsub nga ensayo, nagpanikad na ang wa pay pildi nga Pinoy fighter nga si Froilan “The Sniper” Saludar sa iyang IBF world flyweight title eliminator batok sa Puerto Rica nga si Mc Williams Arroyo karong adlawa sa Ruben Rodriguez coliseum sa Bayamon, Puerto Rico.

Kagahapon atol sa weigh-in, si Saludar nga may 19-0-1 nga record mitimbang og 111.3 lbs samtang si Arroyo (14-1-0) mipatong sa weighing scale sa gibug-aton nga 112 lbs. nga haom sa ilang timbang nga awayan.

Ang promoter nga si Sammy Gello-ani, sa iyang email message ngadto sa philboxing nagkanayon nga andam na gyud si Saludar sa maong away.

Si Saludar migahin og pipila ka semana nga praktis sa gym sa iyang manager nga si Dr. Rajan Yraola sa Quezon City ubos sa ni pagdumala ni Jun Agrabio, kinsa mao usab ang naggiya ni Marvin Sonsona nga bag-ohay lang mipukan ni Wilfredo Vazquez Jr. didto sa New York.

Atubangan sa mga media gipasabot ni Saludar nga dili gyud niya usikan kining maong kahigayonan. Bisan tuod og usa ka Olympian ug maayong fighter si Arroyo apan iyang gipanaad nga iyang buhaton ang tanan niyang mahimo aron modaog.