ANG Philippine National Police (PNP) national headquarters nagpakisayod na og apil sa kalamboan sa imbestigasyon sa kapolisan sa dakbayan sa Davao bahin sa pagpusil-patay sa magpapatigayon nga si Richard King.

Si Sr. Supt. Noli Romana, hepe sa Cebu City Police Office, niingon nga mismo si PNP Chief Director General Felipe Rojas Jr., deputy chief for administration, ang mangu sa ipahigayon nga case conference ugma sa buntag sa Police Regional Office (PRO) 7.

Ang mga sakop sa Davao City Police Office pinangulohan sa ilang hepe nga si Sr. Sr. Supt. Vicente Danao Jr., ang manganhi sa Sugbo alang sa maong conference.

Apil sa motambong ang Regional Intelligence Division, Criminal Investigation and Detection Group ug ubang unit sa kapolisan ug hingtungdang mga ahensiya sa kagamhanan.

Matod ni Romana nga magbinayloay sila og mga impormasyon bahin sa mga negosyo, kalihokan ug ubang kasayoran sa biktima aron matumbok ang mamumuno ug posibleng utok sa pagpatay sa negos­yante.

Si Danao sa iyang bahin, nibutyag nga gi-elevate na ngadto sa regional level ang paggunit sa imbestigasyon sa krimen.

Ang iyang mga sakop ang gipakatap sa nagkadaiyang bahin sa nasod diin adunay mga patigayon si King sa pamasin nga makakuha sila og mga ebidensiya ug mahinungdanon nga kasayoran nga makatabang sa ilang imbestigasyon alang sa posibleng pagpasaka og kaso batok sa gunman ug kauban niini.

Ang banayng King nitanyag na og P1.3 milyones reward money, apil na niini ang P300,000 nga unang gitanyag ni Davao Mayor Rodrigo Duterte.

Ang facial composite sa mamumuno ang gipagawas na sa kapolisan sa DCPO.

“Ang akong ikasulti nga naningkamot ang kapolisan sa siyudad sa Davao nga masulbad kining krimen,” dihang nahinabi sa Balitang Bisdak sa GMA 7 kagahapon dungan sa paghangyo nga hatagan sila og panahon pagsulbad niini.

Si Department of Interior and Local Government Secretary Mar Roxas nipresentar og bag-ong mga estratehiya aron epektibo ang pagpugong sa krimen sa nasod.

Kini human tulo ka dagkong personalidad ang buwag nga gipamusil patay sa tulo ka managlahing mga dapit sa nasod: una, si Urbiztondo Mayor Ernesto Balonglong, Jr., race car champion Enzo Pastor ug ang hotelier nga si King.

Apil sa mga estratehiya ang pagpalig-on sa police visibility pinaagi sa pagmontar og daghang checkpoints, pag-umol og major crimes unit nga maoy motutok sa imbestigasyon sa usa ka dakong krimen ug paglusad sa “Operation Lambat” nga nagtinguhang maminosan ang mga krimen diin ang mga suspek naggamit og mga motorsiklo.