USA ka suspetsadong tigpayuhot sa ginadiling druga ang nasikop sa kapolisan atol sa gipahigayon nga buy-bust operation kagahapon sa kaadlawon sa Piaping Itum, Barangay Macabalan ning siyudad.
Ang suspetsado naila nga mao si Jason Yongco alyas Jojo, 34, ulitawo nga taga Barra, sa susamang barangay.
Gisaysay sa Investigator sa Sunstar Superbalita nga nasikop si Yongco atol sa pinalitay sa ginadiling druga pinaagi sa usa ka nagpatuong buyer.
Gibutyag sa imbestigador nga wala madakpi ang ubang mga kustomer sa suspetsado. Gani ang ilang nagpatuong buyer labing ulahi na nga kustomer niini.
Giingong yano lang gapmaligya kining suspetsado ug sa backgorund check sa kapolisan nasayran gikan sa mga silingan niini nga dunay panahon nga mohagit kini sa mga siligan nga paadtuan ang polis ug ipadakop siya.
Nasayran gikan sa arangan ug maayo nga kahimtang ang pamilya sa suspetsado.
Nakuha gikan kang Yongco ang P400 nga buybust money, usa ka pakete sa gituohang shabu ug laing usa ka pakete sa napalit gikan niini.
Lakip nga nakuha gikan sa suspetsado ang mga paraphernalia sa paggamit sa ginadiling druga sama sa 2 ka disposable lighter nga adunay improvised aluminum foil nga nay dagom ang nakakabit, usa ka Samsung nga cellphone, gunting, ug usa ka improvised nga plastik scoop straw.
Ang suspetsado igo lamang nga moingon nga dili siya makatubag sa pangutana dihang gihinabi sa Sun.Star Superbalita.
Kini kasamtangang detinado sa mini cell sa Police Station 5 sa Macabalan ug naghulat pa sa resulta sa gipahigayong urinary test ug alang sa dugang pa nga imbestigasyon ug posibleng kaso nga ipasaka batok niini.