Drug test gibalik

GIBALIK na sa Land Transportation Office sa Central Visayas ang mandatory drug test sa tanang mga molukat og driver’s license.

Si Alita Pulga, assistant regional director officer-in-charge sa LTO 7, nipahibawo nga nakadawat sila og kamandoan gikan sa ulohang buhatan nga nagmando nila nga ang tanang mga aplikante alang sa bag-o, renewal ug conversion sa lisensiya, kinahanglan ipailawom na sa drug test sugod niadtong Miyerkules ning semanaha.

“We have already the order from the director nga mag-drug test ta og balik,” pagkompirmar sa opisyal dihang nahinabi sa mga tigbalita kagahapon.

Si Joel Maloloy-on, chief operations officer sa LTO 7, niingon nga si LTO Chief Alfonso Tan maoy mipirma sa kamandoan.

Si Pulga nipasabot nga gibalik ang drug test tungod sa kamandoan sa korte sa dakbayan sa Toledo niadtong Oktubre sa niaging tuig.

Sa Office Order Act 2014-319 pinetsahan og Hunyo 16, 2014, si Tan nimando sa tanang mga hepe sa mga buhatan sa LTO, extension offices, licensing centers ug drivers license renewal center and unit nga ibalik ang drug test.