GIPATAWAG Sa buhatan sa komite sa peace and order sa kagamhanan sa Probinsya sa Misamis Oriental ubos ni Bise Gobernador Joey Pelaez ang kadagkoan sa Land transportation Office (LTO-10), Misamis Oriental Provincial Police Office (MPO) ug Philipphine Drug Enforcement Agency-Northern Mindanao (PDEA-10).

Matud ni Pelaez nga tumong sa iyang pagpatawag aron ipaabot ang mga reklamo ug masuta kung unsay mga aksyon sa maong mga ahensya batok sa krimen, mga kasupakan diha sa kadalanan ug ingon man sitwasyon sa PDEA-10.

Dugang niini nga bout niyang tuikon kanila ang kalabot sa traffic code labina gyod ang pagsikop sa mga motorsiklo diin ang mga motorista wala misubay sa balaod, mamatikdan nga wala nisul-ob og helmet. Bout niining ipasikop ang mga nakasupak niini. Gimando usab ni Pelaez nga dilikado usab kaayo ang mga dagkong truck nga mamatikdan nga nakaparking sa daplin sa kadalanan nga walay reflector ang likod ug atubangan nga bahin nga maoy sagad hinungdan dili gakakita sa mga lumalabay sa dalan ug miresulta na hinuon sa pagkabangga.

Bout niya kining paaksyunan sa mga personahe sa LTO aron makigtambayayong sa kapolisan.

Samtang gipaabot usab ni Pelaez sa PDEA-10 kung unsay ilang mga nahimo nga mga operasyon ug unsay kakulangon sa ahensya aron masulbad ug masolusyonan.

Gitinguha ni Pelaez nga unta magmalinawon ang probinsya sa Misamis Oriental ug luwas sa mga aksidente, kriminalidad ug layo sa mga ginadili nga druga. (SVB)