NANUKAD na sila Lorenzo "Thunderbolt" Villanueva ug Adonis Cabalquinto sa ilang tagsa-tagsa ka mga away sa Hunyo 28 didto sa Davao City Recreation Center.

Alang sa bakanteng Asean Boxing Federation bakus, makig-ilog ang walhon nga si Villanueva kang southpaw Indonesian Hendrick Barongasay samtang ang reigning Philippine Super Lightweight champion Cabalquinto modepensa sa iyang titulo kontra sa taga-Laguna nga challenger, Giovani Rota.

"Nindot gyud ni among laban ani kay aggressive na fighter man to siya," pahayag ni Villanueva mahitungod sa iyang kalaban.

Samtang gibutyag ni Villanueva, 27, nga tulo ka bulan siya nagbansay alang sa maong away, "Naga-jogging ko sayo sa buntag padulong sa Eden."

Gisulti ni Coach Richard Dimaluan nga istriktong gimonitor niya si Villanueva sa pagbansay ug dako ang iyang paglaum nga modaug ang Pinoy sa Indonesian fighter.

Alang kang Cabalquinto, nagadagan siya usa ka adlaw sa usa ka semana sa 13 kilometro sa milabay nga tulo sab ka bulan, "Basta ingon nila ang mga left-handed na mga boxer kay kusgan man."

Sila Giovani Rota ug Hendrick Balongasay moabot sa Dabaw sa sunod Miyerkules alang sa maong torneyo nga gi-organisa sa Sonshine Sports Management. (Marizz S. Robilla)