KIDAPAWAN CITY -- Moabot sa 156 ka ektaryang umahan ang naapektuhan sa dakong landslide alas 8:00 sa buntag niadtong Huwebes didto sa probinsiya sa Cotabato.

Sa taho gikan sa North Cotabato Provincial Disaster Risk Reduction Management Council (NCPDRRMC) nga nahugmak ang dakong bahin sa yuta sa Sitio Tinago, Barangay Nabaliko, Arakan gumikan sa walay puas nga pag-ulan.

Nahimong lim-aw (lawa) ang dakong pundo sa tubig gikan sa nahugmak nga yuta sa taas sa bukid.

Gumikan niini, namakwit ang 35 ka pamilya sa kahadlok nga mobuhagay ang dakong lim-aw ug ibanlas ang mga namuyo sa maong dapit.

Mga bakwit gikan sa Sitio Tinago, Barangay Nabaliko ang temporaryo nga namuyo sa Municipal Gym sa Barangay Poblacion.

Gipamahayag ni Arakan Mayor Rene Rufino nga gawas sa umahan sa mga pobreng mga mag-uuma, lima sab ka bay ang gibungkag sa landslide.

Samtang unom pa ka barangay sa Arakan ang padayon nga gimonitor sa lokal nga kagamhanan tungod matud pa landslide prone area.

Sa kasamtangan, nagpaabot na og hinabang si North Cotabato Governor Emmylou "Lala" Talino Mendoza sa mga pamilyang naapektuhan sa landslide. (Edgar Fuerzas)