14-anyos nangawat og P162 mil nasikop

GIKUSTODIYA na sa Women and Children's' Protection Desk (WCPD) sa Buhangin Police Station ang usa ka 14 anyos nga batang lalaki human nangawat og salapi.

Alas 5:00 sa hapon niadtong Huwebes didto sa Block 39, Lot 8, NHA Buhangin nasikop ang katorse anyos nga si alyas Michael, nagpuyo sa nasampit nga dapit.

Ang suspek nasikop human gitudlo sa mga nakasaksi sa pagpangawat diin gisulod niini ang balay sa usa ka Francisco Estores Abear Jr.

Sumala sa WCPD nga walay tawo niadtong orasa ang balay ni Abear butang nga nakahigayon ang suspek nga mosulod ug giablihan ang drawer sa kuwarto sa biktima.

Pag-abot sa biktima gilayon kining mi-report sa kapulisan diin nasutang mokabat sa P300 mil ang salapi nga nawala.

Apan gihimakak sa suspek ang maong kantidad sanglit P162,220 lamang ang iyang nakuha sa drawer nga nakuha sab sa posisyon niini.

Dugang sa kapulisan nga usa ka adlaw una ang hitabo, misulay na og sulod sa balay ang suspek ug misibat kini dihang nakita siya sa tagbalay.

Sa pagkakaron, giindosar na sa WCPD ang suspek didto sa Quick Response Team for Children's Concern. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph