GIKASUHAN na ang usa ka amahan sa City Prosecutor's Office human niya giingong giposposan og kahoy ang iyang singko anyos nga anak sa ilang panimalay didto sa Barangay Paciano Bangoy niadtong Miyerkules.

Ang amahan nag-atubang og kasong kalapasan sa Republic Act 7610 kun Special Protection of Children Against Abuse, Exploitation and Discrimination Act.

Ang amahang si alyas Vic (bansagon gitago agi'g pagpanalipod sa dungog sa bata) gihatud sa korte Huwebes sa buntag aron atubangon ang posibleng kaso nga ipasaka kaniya.

Ang suspek nasikop sa intel operatives sa Sta. Ana Police Station alas 8:00 sa buntag niadtong Miyerkules human midangop ang iyang asawa sa presinto uno sa gihimo niini sa ilang anak nga si alyas Jane.

Sa affidavit sa inahan nga si alyas Mercy, nasayrang samtang naa siya sa iyang silingan alas 7:00 sa buntag, midagan kaniya ang iyang anak ug naghilak.

"Bunal papa kahoy," ingon sa bata nga naghilak.

Dali dayong giadto ni Mercy iyang kapuyo, apan nanghimakak kini nga iyang gibunalan ang bata.

Di na suma pa moduol ang bata sa suspek gumikan nahadlok na kini.

Sa pagsubay sa inahan, dunay dakong bun-og ang bata sa iyang dughan, gasgas sa walang bukton ug sa tuong batiis.

Human sa insidente, gilayong nangayo og pakitabang ang inahan sa opisyal sa Barangay Paciano Bangoy uban sa social worker nga si Rizalyn Vergara aron isumbong sa pulis ang nahitabo.

Gilayong nasikop sa operatiba sa Women and Children's Protection Desk ang suspek sud sa ilang panimalay.

Ang reklamante dihang nahinabi sa Sun.Star Davao niadtong Huwebes didto sa korte giingon niini nga palahubog ang iyang kapuyo ug ginakulata sab siya.

"Dugay na nang irritable akong live-in kay palahubog man god na siya. Katong una, ako pa ang ginadapatan ana niya pero karon iya na mang gidamay ang bata bantog kinahanglan na gyud siyang ipakulong," sulti ni Mercy.

Ang suspek temporaryong gibalhog sa selda sa presinto uno samtang ang bata padayong gitambalan sa Southern Philippines Medical Center. (Uban sa taho ni Ruji Peter S. Abat)