DEAR Noy Kulas,

Ako si JM, taga Toledo City. Usa ko ka lesbian. Gikatagbo nako ang usa ka babaye nga nag-work as bar dancer sa bar diri sa Toledo before. Nakagusto ko niya dayon nagkauyab mi. Niabot og years among relasyon.

Sa among kadugay, sa ilaha mi nag-ipon sa Lahug. Mouli ra ko sa amoa panagsa kon papaulion ko sa akong parents. Mobalik ra pud ko dayon sa ilaha sa hapon ana. Niabot ang time nga napul-an na ko. Wa man pud na nako sila pasagdi sa iyang anak. Akong gihatag unsay ilang gusto.

I thought nausab na siya sa paghawa niya sa bar. One time moadto siyag Toledo city kuyog nako. Abi ko unsa iyahang adtuon, ang boy man diay nga edad-edaran na gud. Ako lang siya gipa­sagdan kay abi nako friend ra niya. Wa ko kahibawo iya diay tong uyab nga mohatag niya og kwarta para sex. Wa ko kahibawo ani hangtod niabot ang punto nga gi-urinary tract infection siya (UTI). Unya ako ang iyang gibasol bahin ana kay tungod lagi lesbian ko unya wa mi mag lovemaking. Nasakpan nako siya nga dunay lain mao nga nilayas ko sa ilaha nga wala magpahibawo niya kay nangluod ko niya bahin ana.

Sa ka dugay namo nga nag-ipon, wa siya maingon ana hangtod naa na to nga guy nga bisan kinsa lang say babaye.

Wa ko mananghid niya nga molakaw ug nilayas ko kay sakit kaayo iyang gibuhat niya

nako. Nganong nakabuhat man siya ana nako. Until now, siya gihapon ang naa sa akong huna-huna. Unsaon man nako nga ako siyang makalimtan?

JM

JM,

Kuyaw kon mopadayon ka usab sa pagpakigrelasyon niya unya ingon adto ang iyang kinabuhi nga mopatol og lalaki nga kwestyonable. Di ra ban a maayo kay kuyaw ka sa sexually transmitted disease niana. Busa, ang imong desisyon sa pagbiya kaniya sakto ug haum kaayo.

Di usab siya makamahay nimo kay imo silang gihatagan sa ilang panginahanglan. Imo pang gisuportahan ug lahi sa uban, wa nimo prisoha sa imong kalibutan aron imong ma-solo.

Lisod baya kalimtan ang relasyon nga milanat og pipila ka mga tuig,labina kon wa kay gipuli nga mas bug-at kay kaniya. Kana hinuong healing sa usa ka relasyon moabot ra sa panahon nga di mo lang paabuton. Maorag samad nga di ka lang makabantay, mag-anam og kaalim, mokugan ug mouwat. Mao sab na ang gugma, molabay ang kasakit nga di mo lang paabuton.

Cherish sa unsay inyong nangagi. Kay niabot ang panahon nga makausa nakaatiman ka og duha ka mga kinabuhi nga gimahal mo sa tiunay. Hayan moabot ang panahon nga ikahinagbo mo ang babaye nga angay alang kanimo.

NOY KULAS

Alang sa imong problema, e-mail sa kulassuper@sunstar.com.ph