DUMAGUETE CITY – Niubos ang kaso sa dengue sa lalawigan sa Negros Oriental sud sa unom ka buwan ning tuiga ikompara sa miaging tuig.
Mao kini ang gibutyag ni Dr. Edgardo Barredo, assistant officer sa Integrated Provincial Health Office ug Dumaguete Health Officer Dr. Maria Sarah Talla atol sa panagtigom nga gipahigayon sa usa sa mga hotel ning dakbayan.
Gituki sa tigum ang mga pamaagi nga angay buhaton aron pagpugong sa pagsaka sa mga kaso sa dengue sa dakbayan ug lalawigan.
Nahisgutan usab nga usa sa mga hinungdan sa pagdagsang sa sakit nga dengue mao ang pag-usab-usab sa panahon.
Subay sa panahon na sa tinguwan, napanglantawan nga mosaka ang gidaghanon sa mataptan sa sakit.
Matod ni Barredo nga niubos og 76 porsiyento ang mga kaso sa dengue karong tuiga gikan sa buwan sa Enero hangtod ning buwana kompara sa miaging tuig.
Sa tibuok probinsiya aduna nay 376 ka mga kaso sa dengue karong tuiga ug duha ang nakabsan sa kinabuhi. “From January 1 to June 2014 duna tay 376 dengue cases ug two deaths,” tipik sa pamahayag ni Barredo.
Sa miaging tuig sa samang panahon, adunay 1,586 ka mga kaso sa dengue ug upat ang patay.
Nag-una sa labing daghan og kaso mao ang dakbayan sa Dumaguete gisundan sa lungsod sa Sibulan Tanjay, Guihulngan, Bacong, San Jose, Amlan, Bais, Siaton ug Valencia. (LEJ)