Reservoir usa ka tuig nga wa magamit

ORMOC CITY- Mipiyait karon ang mga residente sa Purok 5 ug 6 sa Barangay Alta Vista ning dakbayan kay hapit usa ka tuig na nga wa pa sila makapahimulos sa bag-ong gitukod nga water reservoir sa Ormoc Waterworks Systems Administration (ORWASA).

Ang naasoyng mga purok gilangkuban sa 500 ka panimalay nga maoy ma­kabenipisyo sa reservoir.

Ang reservoir adunay contract amount nga P2.9 milyones diin gisugdan niadtong Marso sa milabayng tuig ug nahuman niadtong Agosto 2013 apan hangtod karon wa pa kini magamit sa gatusan ka mga residente.

Sumala ni Engr. Manny Borela sa ORWASA nga nalangay ang pag-testing sa reservoir gumikan kay wa pay supply sa kuryente ug may kuwang pa nga pisa aron mapundohan na og tubig nga gikan sa Ahag.

Matod ni Barangay Kapitan Myrna Mangle nga nipirma nalang siya og acceptance sa proyekto bisan pa man og wa pa kini masuwayi nga bu­tang nga gikwestyon karon sa mga residente.

“Naa man gihapoy hold ana kay naa man silay mga P400,000 seguro to nga retention unless ma-testingan na,” matod ni Mangle.

Sayo ning buwana, gi­testingan na pagpundo sa Orwasa og tubig ang reservoir apan way swerte kay dunay leak hinungdan nga nagpalit na usab og materyales ang kontraktor niini aron sa paghimuong retrofitting.

“Nagpalit na sila (kon­traktor) og mater­yales for retrofitting, gamitan naman na nato karon og epoxy special kay sa una parlastic raman to ato gigamit,” matod ni Engr. Gerry Germano, labaw sa Orwasa.

Bisag masulbad na ang leaking, di pa gihapon segurado si Germano nga masuplayan na ang gatusan ka mga panimalay kay may problema pa sa yuta nga agian sa mga pipe.

“Naa na hinuon na siyay pipe nga nagkonektar sa old reservoir padung sa new reservoir, naa na giagi sa main road pero ang para sa kabalayan di pa ta ka kuan kay wa pa man gud na ma donate ang yuta nga maagian sa mga pipe,” dugang ni Germano.

Ang pagbutang og bag-ong reservoir usa naki­tang sulosyon sa kagamhanan aron di dayon mahutdan og supply ang mga kabalayan sa Alta Vista ug lakip na sa Carlotta Hills.

Masaligon si Germa­no nga masulbad dayun kini nga problema sa re­servoir ug way dapat kabalak-an. (JKDP)