SA weigh-in pa lang, gubot na. Unsa pa kaha kon naa na ibabaw sa ring.

Nagkanayon si Prince Albert Pagara (20-0, 14 KOs) nga nakapabukal og samot sa iyang dugo ang kagubot nga nahitabo tali kanila ni Mexican Hugo “Olympico” Partida (21-4, 16 KOs) kagahapon atol sa official weigh-in sa Robinson’s Place sa Fuente Osmeña.

Asoy niya nga iyang ipahungaw ang tanan niyang kapungot inig abot nila ni Partida ibabaw sa ring karong gabii sa co-main event sa “Pinoy Pride 26: Fist of the Future” sa Weterfront Hotel sa Lahug, Cebu City.

Sa laing main event sa promosyon, nga gidalit sa ALA Promotions ug ABS-CBN, ang maguwang ni Prince Albert nga si Jason (33-2, 20 Kos) modepensa sa iyang World Boxing Organization (WBO) International light welterweight title batok sa laing Mexican nga si Mario “Rocky” Meraz (20-3, 16 Kos).

Dihang nagpahulagway sila si Prince Albert ug Partida human sa weigh-in, nagpakong ang ilang mga agtang hinungdan nga gibadlong sila sa nag-announcer nga si Ronnie Nathanielsz.

“Bawal ang headbutt dito,” matod pa ni Nathanielsz, kinsa usa ka bantugang sports journalist sa Pilipinas.

Unya dihang nauwang sila, miaksyon og kumo si Prince Albert dapit sa nawong ni Partida. Daling mibawos si Partida ug gisukmag gyud niya ang nawong ni Prince Albert.

Di man tuod kusog ang pagsukmag ni Partida sa nawong ni Prince Albert apan nakapainit kini’g samot sa sitwasyon. Mobawos sab unta og sukmag si Prince Albert ug maayo na lang kay nauwang ra ang duha.

“Nainit gyud ko’g samot. Magkita na lang mi sa ibabaw sa ring,” matod ni Prince Albert.

Ilugan nila ni Prince Albert ug Partida ang bakanteng International Boxing Federation (IBF) Inter-Continental junior featherweight title.

Sa ilang bahin, sila si Jason ug Meraz nagbinaharay nang daan sa prescon niadtong Huwebes nga naa gyu’y ma-knockout sa ilang away.

“Kondisyon na kaayo ko. Paningkamutan gyud nako nga ako siyang ma-knockout. Dili lang ko mosaad pero kon naay opportunity nga ako siyang ma-knockout, ako gyung buhaton,” matod ni Jason.

Laing kaintapang away sa promosyon mao ang tali nila ni ex-world title contender Jimrex “Executioner” Jaca batok Masayoshi Kotake sa Japan, ug ang laing ex-world challenger nga si AJ Banal batok kang Defry “The Hammer” Palulu sa Indonesia.

Magsangka sab sila si Elmo Traya batok Japanese Naozumi Tsuchiyama, Richard Barios batok Lester John Pronco, Jess Waminal batok Fritz Cabilla ug Japanese Kazuma Ejiri batok Jerome Baja.