MASALIGON si Miami Heat president Pat Riley nga dili mabungkag ang kinauyokan sa ilang puwersa hilabi na ang ilang Big Three bisan pa man sa dakong kapakyasan nga ilang nasinati sa miaging National Basketball Association (NBA) Finals batok sa San Antonio Spurs.

Ang Big Three nga sila si LeBron James, Dwyane Wade ug Chris Bosh pulos adunay opsyon nga dili motiwas sa nahabiling usa ka tuig sa ilang tagsatagsa ka kontra aron mahimong free agents.

Nipagawas og mensahe si Riley nga tatawng iyang gitumong alang kang James, kinsa gikonsiderar nga labing maayong magduduwa sa NBA sa kasamtangan.

“We’ll find out what we’re made of,” batbat ni Riley. “It’s not about options, not about free agency. We have an opportunity to do something significant. But losing is a part of it. When you do you deal with it.”

Matod ni Riley nga buhaton niya ang tanan alang sa kaayuhan sa Heat ug kinahanglan lang gyung pahugtan nila ang paggunit alang sa panaghiusa.

Ang Heat mao lay ikatulong team sa kasaysayan sa NBA nga nakasulod sa finals sa upat ka sagunson nga mga tuig. Ning maong biyahe, nakalangkat sila og duha ka mga kampiyunato.

“It has happened to all of the great dynasties in this league,” matod ni Riley kabahin sa ilang kapakyasan.

“We won two of the last three and we’re going to go from there and we hope all of those guys are going to want to come with us.”

Si James maoy gitutokan og maayo ni Riley gumikan kay wala pa’y klaro nang desisyon niini.

Samtang si Wade nipadayag nang da­an nga wala siya’y planong mobalhin og team ug dako ang poruhan nga mao sab kini ang buhaton ni Bosh. (AFP)