USA ka bus sa Bachelor Express nga nagbiyahean gikan sa siyudad sa Surigao paingon denhi sa siyudad sa Cagayan de Oro ang nasikop sa mga personahe sa Land Tranportation Office-Northern Mindanao (LTO-10) human giingong adunay mga kulang nga papeles ug nakasupak sa bag-o lang gipatuman nga Joint Administrative Order (JAO).

Ang driver niini nga mao si Gary Mariano wala na kaayo midetalye sa pagkasikop tungod kay giingong iya na lamang kining isalig sa management sa Bachelor.

Si Atty. Nelson Manaloto kinsa Assistant Regional Director sa LTO-10 niingon nga kung aduna silay nakita nga mga kakulangon sa papeles sa maong nadakpan posibleng makasupak gyod ang kompanya sa bus niini ug makabayad gyod kini sa multa apan tagaan nila kini og higayon nga makapakita og mga saktong papeles o dukomento.

Dugang ni Manaloto nga kung mosubay lamang sa insakto ang mga bus operator ug uban pang public utilty vehicle (PUVs) walay problema kung unsa kadako ang multa sa gipatuman nga JAO ug dili gyod mosupak sa balaod.

Kahinumduman gitabo og protesta ang pagpatuman niini niadtong Huwebes diin mismon si Julieto Galleros kinsa presidente sa Solidarity of Transport Alliance in Northern Mindanao (Starex-Piston) denhi sa siyudad sa Cagayan de Oro ang nangulo sa protesta diin gipaabot niini nga dili palabian ang kadako sa multa ug basin unya mas modaghan ang mga kotong polis niini.

Apan si Land Transportation Franchising and Regulatory Board (LTFRB-10) Regional Director Mandangan Darimbang niingon nga dili mahitabo nga makahigayon ang kapolisan sa pagpangutong tungod kay bugtong ang personahe lamang sa LTO nga adunay gibou nga task force ang gitugotan sa pagpangsikop ug pipila ka personahe sa LTFRB ug wala nay lain pa. (SVB)