DUHA ka semana sukad gibuksan ang klase sa mga pampublikong tunghaan, padayong nakadawat ug mga reklamo ang Kapitolyo labot sa kakuwang sa mga magtutudlo sa nagkadaiyang tunghaan sa Sugbo.
Matod ni Gob. Junjun Davide duna gihapoy mga local government unit (LGU) ug mga tunghaan sa kalungsuran nga mitaho ngadto niya labot sa maong problema hinungdan nga iyang gi-refer ang maong problema ngadto sa Department of Education (DepEd).
Nagtagbo silang Davide ug Cebu Schools Division Supt., Dr. Arden Monisit, nga aminadong DepEd sa kakuwangon sa ilang mga magtutudlo.
Wa hinuon gitumbok sa gobernador kung asang mga tunghaan ug LGUs ang nitaho kaniya nga kuwang og maestra.
Andam nga mopagawas og pundo ang Kapitolyo alang sa pagkuha og dugang magtutudlo. (AZDL)