WALA gisalikway sa kampo ni Mayor Johnny delos Reyes (JVR) sa dak­bayan sa Talisay nga adunay mga tawo nga nagpaluyo aron mapasakaan sila og kasong kriminal ug ng administratiba sa Office of the Ombusdman Visayas.

Usa ka Jun Cabrera nga taga Talisay maoy nipasaka og kaso ngadto sa Ombudsman uban sa iyang abogado nga si Rene Abcede Jr. bahin sa taho sa Commission on Audit (COA) labot sa Black Pearl Security Agency.

Si Cabrera niingon nga ang kagamhanan sa Talisay, base sa taho sa COA, nagpakita nga gikuha ang serbisyo sa Black Pearl Security A­gency niadtong Agusto sa miaging tuig nga wala gipaagi sa bidding.

Dason ni Cabrera, nagsugod na sa ilang trabaho sa Talisay bisan niadtong higayona wala pay license to operate ang ahensiya ug gipahigayon ang bidding sa pagkuha og security agency niadto lang Marso karong tuig, diin Black Pearl maoy nidaug.

Nasuta sa COA nga niadtong higayona, gawas sa pagkuha sa security agency, ang 91 ka security guards gihimo usab nga job order employees sa tag P430 nga suweldo matag adlaw.

Gihulagway sa COA nga alkanse ang siyudad samtang, ang ubang job order employees nga nadistino sa ubang department sa city hall nagsuweldo lang og P300.

Si City Administrator John Yre delos Reyes, chairman sa bids and awards committee (BAC) ug lakip sa gikiha, niingon nga andam nilang atubangon ang kaso ug kampanta nga makasa­bot sa COA.

Wala niya isalikway ang posiblidad nga aduna tawo nga nagsugo ug nagpaluyo sa maong kaso, apan wala ibutyag ni Yre kon si kinsa kini.

Nasayran nga ang Black Pearl kutob na lang karong buwana sa ilang pagserbisyo sa city hall base sa ilang kontrata.

Sila si JVR ug Yre pulos nipadayag sa ilang katagbaw sa serbisyo sa ahensya.

Ang mayor sa interview sa media nibutyag nga wala pa nila giagi og bidding niadtong higayona human wala kini license to operate apan, ang mga guwardiya nga pulos taga Talisay gipabansay sa Blackpearl base sa ilang programa na gitawag og Adopt Talisaynon Program.

Nahitabo kini dihang human nitapos ang serbisyo sa unang security agency sa kanhi administrasyon.