NIHIT man tuod ang mga jeepney niadtong Huwebes tungod sa strike nga gipahigayon sa mga driver ug operator, ang mao nga adlaw nitala og labing daghang mga alarma sa aksidente.

Subay kini sa record gikan sa Cebu City Traffic Operations and Management (Citom).

Sugod sa alas 7 sa buntag hangtod na sa alas 3 sa hapon, mitala og 17 ka mga aksidente ang Citom nga naglambigit sa jeepney batok pribado nga sakyanan, ingon man motorsiklo batok four-wheel nga mga sakyanan.

Sa mao nga gidaghanon sa mga alarma, duha ka mga tawo ang na­nga­angol atol sa panagbangga, apan luwas na sa delikado nga kahimtang.

Samtang gikan sa alas 3 sa hapon hangtod sa alas 11 sa gabii, nitala og 28 ka mga panagbangga sa mga sakyanan ang Citom, duha niini dunay nangaangol.

Kadaghanan sa mga bangga nahitabo sa norte nga bahin sa siyudad.

Sa mao nga nahisgutang mga oras, dunay 23 ka mga bangga nga nahitabo gikan sa Archbishop Reyes Avenue paingon ngadto sa Talamban.

Tungod sa daghang mga bangga nga nahitabo sa norte, migrabe ang kahuot sa trapiko bisan pipila lang ka mga jeepney ang nagdagan.

Sa mao usab nga adlaw, nitala ug 10 ka mga bangga ang nahitabo sa central sector sa dakbayan, diin mahisakop ang Osmena Boulevard ug downtown area ug gisundan dayon sa south sector diin dunay walo ka mga panagbangga sa sakyanan.

Niadtong Huwebes, gibana-banang 80 porsyento sa mga jeepney driver ang nangapil ug ningsuporta sa lihok protesta nga gipasiugdahan sa Pagkakaisa nga mga Samahan ng Truper at Opereytor Nationwide (Piston).

Liboan ka mga kawani ug estud­yante ang nangatanggong sa mga karsada sa dakbayan sa Sugbo tungod sa kanihit sa mga PUJ nga namiyahe.

Giprotestahan sa Piston ang dagkong mga multa base sa memorandum sa Department of Transportation and Communication (DOTC).