ANG reigning International Boxing Organization (IBO) superflyweight title Edrin "The Sting" Dapudong sa M'lang, North Cotabato andam na nga depensahan ang iyang titulo batok Lwandile Sityatha sa East London, South Africa sa Hulyo 18.

Ang 28 anyos nga Dapudong, gigunitan ni kanhi North Cotabato Gov. Manny Pi¤ol alang Sonshine Sports Management ni Pastor Apollo C. Quiboloy, miingon, "Paningkamutan nako nga madepensahan ang titulo".

Duna siyay rekord karon nga 30 daug, upat pildi lakip na ang 18 knockouts.

Mibisita sila kauban si coach Rex Pe¤alosa ug laing Sonshine Sports Management boxers ug coaches nga makigharong sa Hunyo 28 didto sa Davao City Recreation Center sa Davao Sportswriters Association (DSA) Forum sa NCCC Mall B3 Center niadtong Huwebes.

Sa laing interbyu sa telepono, gibutyag ni Pe¤alosa nga "Dako ang tsansa nga madepensahan ni Edrin iyang bakus tungod kay nakita nako nga ensayado kini. Maayo iyang kondisyon karon."

Ang banggiitang coach miingon nga duha ka oras ang ilang pagbansay sa boksidor sa Manny Pacquiao Gym sa Toril.

"Preparado kaayo mi. Almost two months among training ug dili mi moubos sa 110 rounds ka sparring usa pa ang game."

Gihulagway sab niya nga si Dapudong usa ka counter-puncher, "Ang power ni Edrin maingon nato nga 90 percent kay knockout artist man siya. Kaya kaayo niya iyang kalaban kay fighter pod, anad si Edrin anang klase nga kalaban. So dako akong kompiyansa sa iyaha."

Sayo niini, gipatulog ni Dapudong si Gideon Buthelezi pinaagi sa unang round knockout niadtong Hunyo 15, 2013 sa ilang rematch sa Emperors Palace, Kempton Park, Gauteng sa South Africa diin nakabalos siya sa split decision loss sa maong kalaban sa una nilang pagharong niadtong Nob. 10, 2012 sa parehong lugar. (MSR\MLSA)