HAGONOY, Davao del Sur - Nakig-alayon na ang Hagonoy Police Station ngadto sa mga silingang istasyon aron nga mailhan na ang babayeng' nabangalan nga naglutaw sa Guihing River.

Gibutyag ni Senior Inspector Marvin Hugos, hepe sa Hagonoy Police Station, nga ala 1:00 sa hapon, Biyernes, nakit-an ang patay'ng lawas sa biktima mao nga dali nila kining gidala sa duol nga punerarya.

Gitataw ni Hugos nga hayan dili taga didto sa ilang lugar ang biktima sanglit way bisan usa nga nakaila kaniya.

Gumikan niini, nanawagan na ang kapulisan ngadto sa mga pamilyang nawad-an og kabanay nga makig-alayon sa ilang buhatan hayan mailhan na kinsa ang biktima.

Dako ang panaghap sa kapulisan nga naanod kini sa kusog nga bul-og sa tubig dihang nahitabo ang pagbaha ug nasangit sa Number 3 Hernandez Compound sa Davao Sugar Center Corporation.

Gihulagway ni Hugos nga ang babaye hingkod na og pangedaron ug nagsul-ob og kolor pula nga pantalon ug brown nga t-shirt dihang nabangalan. Orlando B. Dinoy