DAVAO CITY - Mokabat sa 20 ka mga balay ang daling gilamoy sa kalayo human miulbo ang sunog alas 7:10 sa gabii niadtong Biyernes didto sa Purok 2, Barangay 23-C, Isla Verde.

Sumala ni Fire Officer 2 (FO2) Jerry L. Sedayao, arson investigator sa Central Fire Station sa Bureau of Fire and Protection (BFP) nga mokabat sa 20 ka mga balay ang gilamoy sa kalayo nga nagsugod sa panimalay ni Erlinda Celebros.

Giingon sa opisyal nga nagsugod ang kalayo sa kuwarto ni Micheal Celebros kinsa nagluto kon diin "butane" ang gigamit niini.

"Base sa atong inisyal nga imbestigasyon gikan sa mga silingan, dunay explosion ang nahitabo sa kuwarto ni Michael. Butane ang giingong gigamit sa pagluto," sulti ni Sedayao sa pakighinabi sa Superbalita.

Alas 8:30 na sa gabii nga gideklarang fire out sa kabomberohan ug giingon sa opisyal nga nakat-on ang mga residente paunsa isalbar ang kaugalingon ug mga gamit.

"Mora'g nakat-on ang katawhan sa dapit ug kabalo na sila unsaon kung asa moagi para mohiluna ang bombero. Na-learned na sila sa ilang nasinatian atong April 4," sulti sa opisyal.

Gibana-bana nga moabot og P1 milyon ang danyos sa maong sunog.

Ang mga nasunogan temporaryong gipahiluna sa Barangay 21-C Gym ug gipang-validate na sa City Social Services and Development Office aron mahatagan og hinabang sa lokal nga kagamhanan. (Jeepy P. Compio)