UPAT ka “persons of interest” ang gitan-aw karon sa kapolisan nga posible maoy nagpapatay sa magpapatigayon nga si Richard King sa dakbayan sa Davao niadtong Hunyo 12 taliwa sa nagpadayon nga imbestigasyon sa krimen.

Kini ang gibutyag ni Philippine National Police Deputy Director General Felipe Rojas Jr., deputy chief for administration, human sa gipahigayon nga case conference sa kamatayon ni King sa Po­lice Regional Office (PRO) 7 kagahapon.

Ang conference gitambungan usab sa mga imbestigador gikan sa Cebu City Police Office, Davao City ug Iloilo City ug ubang unit sa kapolisan sa PRO 7.

Apil niini ang Criminal Investigation and Detection Group (CIDG).

Siya ang nangulo aron mapaspasan ang imbestigasyon subay sa kamandoan ni Department of Interior and Local Government Secretary Mar Roxas ug PNP Chief Allan Purisima.

“This is in compliance with the instruction of the President for the police to solve major crimes that happened in the last two weeks,” butyag ni Rojas ngadto sa mga tigbalita.

Apil na niini ang pagpusil patay sa race car champion nga si Enzo Pastor, Urbiztondo, Pangasinan Mayor Ernesto Balonglong Jr., hotelier nga si King ug pag-ambush sa duha ka mga pulis sa Batangas.

Atol sa conference, gituki ang mga ebidensiya ug mahinungdanong kasayoran nga makatabang sa imbestigasyon.

Nahisgotan usab sa conference ang giingong land-grabbing issue batok ni King, base sa gibutyag sa mga imbestigador gikan sa Police Regional Office (PRO) 6 sa Iloilo.

Nasayran, ang gipanag-iya nga hotel ni King sa Boracay ang naapil sa pagpatay sa tigpamaba sa Boracay Ati Tribal Organization niadtong Pebrero 22 sa niaging tuig.

Ang Special Investigation Task Group Richard King nipagawas na og facial composite sa mamumuno sa krimen sa niaging semana.

“May sketch na, but we’re still looking into the whole group. Behind that gunman still the mastermind, yun ang tinitingnan natin,” nagkanayon si Rojas ngadto sa mga sakop sa media.

Ang nakuha nga empty shell sa crime scene ang i-match nila sa ballistics information system aron mahibaw-an kon ang armas nga gigamit sa gunman nagamit ba sa na­ngaging mga krimen.

Si Rojas niingon nga wa silay nakit-an nga link nga magtumbok nga ang pagpatay ni King may kalambigitan sa drogas.

“We don’t have evidence on that. We couldn’t find any link with him on a drug syndicate,” ingon niya.

Way gihatag nga timeframe pagsulbad sa pagpatay ni King apan si Rojas masaligon nga masulbad ang krimen ug makakuha sila og lig-ong ebidensiya aron mobarog ang kaso ngadto sa korte batok sa mga nagpaluyo niini.

“Hinay-hinay pero kanunay. It just takes time to investigate para pag-file sa case, dili ma-dismiss ang kaso, solid evidence ato gipangita,” dugang ni Rojas.

Suma pa niya nga makatabang ang P1.3 milyones nga reward alang niadtong makahatag og impormasyon pag-ila ug pagtultol sa nahimotangan sa gunman.

“It would help, so we’re appealing anybody in the know that could help in the investigation and successful prosecution of the case, makukuha nila ang reward money,” dugang niya.

Si King, chief executive officer sa J. King and Sons Co. Inc, ang gipatay sud sa gipanag-iyang Vital-C Health Buildings samtang nanihapon kauban sa iyang mga empleyado. (SCG/taho gikan ni DSM sa Sun.Star Cebu)