WA PA moabot og 50% sa mga apektadong balay sa Sugbo nga naapektohan sa bagyong ‘Yolanda’ niadtong Nobiyembre sa miaging tuig ang nahatagan og shelter assistance gikan sa kagamhanan.
Sumala sa taho sa pangulo sa Provincial Disaster Risk Reduction Management Office (PDRRMO) Baltazar Tribunalo Jr., ngadto kang Gob. Hilario Davide III, 32 porsyento pa lang ang natabangan sa gobiyerno sa pag-ayo sa ilang balay.
Niabot ngadto sa 103,318 households ang naapektuhan ni ‘Yolanda.’
Gipadayag ni Tribunalo nga moabot sa P285 million ang nadawat nga ayuda sa Sugbo gikan sa nagkadaiyang ahensiya sa gobiyerno ug gikan sa foreign ug local donors.
Apan iyang gihimug-atan nga P78 million pa lang niini ang nahatag ngadto sa mga apektadong lokal nga kagamhanan.
Sa Sugbo, moabot ngadto sa 16 ka mga local government units (LGUs) ang naapektuhan ni Yolanda.
Giklaro ni Tribunalo nga dili sab tanang pundo ang naa gihatag sa provincial government.
Matod niya, iya lang gisumada ang tanang nadawat sa Sugbo bisan kadtong wala giagi sa Kapitolyo.
Lakip sa nadawat sa probinsiya mao ang P33 milyones gikan sa Bureau of Fisheries and Aquatic Resources (BFAR).
Ang Department of Agriculture nakahatag sab sa Sugbo og P115 milyones, P128 million gikan sa Department of Interior and Local Government ug ang DSWD nihatag og emergency shelter assistance direkta na ngadto sa mga LGU.
Human maaprubahi sa cabinet cluster ang rehabilitation plan sa Sugbo, wa pa matino kon hingpit nang napirmahan ni Presidente Benigno Aquino III ang kamanduan pagpagawas og pundo.
Sa rehab plan sa Sugbo, gitumbok nga moabot sa kapin sa P12 bilyones ang gikinahanglan alang sa rehabilitasyon. (AZDL)