NIHANGYO ang Department of Education (DepEd) sa kagamhanan sa lalawigan sa Sugbo nga idonar ang yuta nga kasamtangang giukopahan niini sa Sudlon, Barangay Lahug, siyudad sa Sugbo.

Ang Kapitolyo mao ang nanag-iya sa luna diin naglumbay ang nagkadaiyang mga buhatan sa ubang mga ahensiya sa kagamhanan.

Si Dr. Arden Monisit, provincial schools division superintendent, personal nga nihangyo niini kang Gobernador Hilario Davide III atol sa ilang hamubo nga tigom sa Kapitolyo niadtong Biyernes.

Ang gobernador niingon nga mananghid una siya sa Sangguniang Panlalawigan sa Sugbo bahin sa hangyo sa DepEd Cebu Province Division.

Ang maong buhatan nag-ukopar sa lote subra na sa walo ka tuig karon diin nagplano kini nga ipaayom-ayom ang kasamtangang building nga nagbarog sa dapit.

Sa samang tigom, gipaabot sa gobernador ngadto kang Monisit ang iyang nadawat nga mga report nga nagkuwang og mga magtutudlo ang pipila ka mga tunghaan sa elementarya ug sekondarya sa kalungsoran.

Matod niya ang ubang magtutudlo nagtudlo og duha ka klase gumikan sa maong kakuwangon.

“The fact nga gi-relay diri nato so ako pud gipahibawo si Supt. Monisit sa situation. And I think he’s aware of that,” nagkanayon ang gobernador atol sa press conference.

Wa hinuon mohatag og numero si Davide kon pila ang kuwang nga mga magtutudlo sa probinsya.

Sa kasamtangan, moabot og 44,000 ang mga magtutudlo sa tibuok Central Visayas.

Dugang 3,425 ka bag-ong mga magtutudlo ang kuhaon sa DepEd 7 aron masolusyonan ang problema sa kakuwang og mga magtutudlo sa pipila ka division sa rehiyon. (SCG)