NAMATAY ang gidudahan nga drug pusher atol sa engkwentro tali sa kapulisan pasado alas 10 sa miaging gabii sa sityo Riverside, Barangay Duljo Fatima, dakbayan sa Sugbo.
Nasakmit sa kapulisan ang 30 ka medium packs sa shabu nga balor og P900,000 ug usa ka .45 kalibreng pistola nga dunay lima ka mga bala gikan kang Lloyd “Van Damme” Cabahug.
Si Cabahug nga giingong level 2 drug pusher kay makabaligya og 200 gramos matag semana namatay human gidala sa Cebu City Medical Center.
Lakip sa napagan mao ang nagtan-aw og telibisyon nga si Eduardo Adaza, 43, taga Barangay San Nicolas ning dakbayan.
Sa pasiuna nga imbestigasyon nga gihimo nila ni SPO1 Ruth Violango ug mga kauban sa Homicide Section sa Cebu City Police Office nagbutyag nga mipahigayon og buy bust operation ang mga sakop sa Criminal Investigation Branch sa maong lugar.
Target sa operasyon si Cabahug, giila nga usa sa mga iladong pusher sa dapit.
Apan samtang gihimo na ang buy bust operation ug nitunol siya sa shabu nga balor og P1,000, siya nakamatikod nga pulis ang iyang gitunolan mao nga giingong nidagan ngadto sa iyang balay.
Niadto ang mga pulis sa iyang balay, apan giingong gipamusil sila.
“Amo pa siya gihatagan og chance nga mo-surrender, pero dili man gyud siya. Mao napugos mi pagsukol,” matod ni Supt. Romeo Santander, hepe sa CIB, sa interbyu sa Sun.Star Cebu.
Nahunong ang pinusilay dihang si Cabahug naigo na.
Ilang gidala ang suspek sa Cebu City Medical Center (CCMC), apan namatay sa paglabay sa pipila ka mga oras.
Nasakmit sa kapulisan ang nagkadaiyang mga gamit sa pagsuyop sa drugas ug P3,000 nga gituohang halin sa illegal nga kalihukan.
Nagtuo si Santander nga bag-o lang nakadawat og supply sa shabu ang suspek.
Ilang gisusi kon diin pang mga lugara nag-operate si Cabahug gawas sa Barangay Duljo-Fatima.
Si SPO1 Dindo Lumapac, uban sa mga sakop sa Crime Scene Investigation Unit (CSIU) ,naka-recover sa dapit og usa ka kalibre .45 nga pistola, lima ka mga bala sa kalibre .45, usa ka magazine sa kalibre .45 nga pistola, tulo ka mga kabhang sa bala sa 9mm pistol, medium packs sa gituohang shabu.
Samtang si Adaza naa pa sa tambalanan giatiman sa mga doctor. (Dugang taho ni DSM sa Sun.Star Cebu)