NATURAL lang nga moi­ngon ang mga sad-an nga sila inosente. Sa laing bahin, sakto sab kining giingon ni kanhi president Joseph Estrada nga ang iyang anak nga si Sen. Jinggoy Estrada angayang isipon nga inosente hangtod nga mahukmang sad-an.

Nga sila inosente nga nalambigit sa P10 bilyones nga pork barrel scam ni Janet Lim-Napoles maoy linya karon niining tulo ka mga senador – si Jinggoy, Sen. Bong Revilla, ug Sen. Juan Ponce Enrile.

Si Revilla nga mao mismoy nisurender sa Camp Crame sa miaging Biyernes niingon gani nga molansar siya pagka president bisan pa man og naa sulod sa prisuhan.

Si Enrile, sa iyang bahin, niinsister nga way ebidensya nga nagpakita nga siya nidawat og kwarta. Apil sa gikiha mao ang iyang kanhi chief of staff ug giingong uyab niadtong tungora nga si Gigi Reyes.

Politika?

Nagtuo ko nga kining linya nga pamulitika lang kining pagkiha ug pagpapriso nilang tulo dunay bulok sa politika ug nalambigit kini sa umaabot 2016.

Ang ako lang masulti mao: kon atong hatagan og gibug-a­ton kining maong linya, buot ipa­sabot ba nga di na lang kita moimbestigar, mokiha, ug mo­silot og mga kurakot nga politiko kay pamulitika lang kini?

Kahinumdoman, layo pa kaayo ang piliay sa 2016 dihang nibuto ang Napoles scam sa miaging tuig. Ug nitumaw na kining ilang mga pangalan.

Kon buot hunahunaon, dugay kaayo ang giingong im­bestigasyon ug matod pa, justice delayed is justice denied. Wa ta maghisgot og hustisya alang kanila tulo. Ang gihisgutan mao ang hustisya alang sa katawhan nga gikawatan og binilyon.

Sa laing bahin, atong makita nga kini mismong tulo ang namulitika. Ilang gigamit ang politika isip taming aron di madutlan sa mga akusasyon.

Kay di ba diay pamutilika ang pagpatawag og dakong tigum sa mga tigsuporta nga niuban kaniya dihang siya nisurender sa kapulisan. Dayon pag-abot, nianunsyo nga mo­dagan siya pagka presidente.

Di sab ko makalimot niadtong diskurso ni Sen. Estrada di­hang, imbes motubag sa mga akusasyon batok kaniya, naghisgot hinuon kabahin sa DAP.

Human sa maong pagdiskurso, nisugod dayon ang mga lain-laing tingog sa oposisyon sa pag-ataki ni Presidente Noynoy Aquino.

Si Jinggoy maoy unang nibunggo sa DAP, apan mas nindot unta ang dagan sa maong kontrobersiya kon lain pa unta ang naghisgot niining DAP.

Bisan pa man, nahibaw-an na karon nga ang pork barrel dili lang legislative pork. Naa say gitawag og presidential pork. Ug tuyo sa Cebu Coalition Against the Pork Barrel System nga mawagtang kining legislative ug presidential pork.

Wa kitay gidapigan nga mga kampo sa politika. Ang makasubo mao kining mga way klarong mga pasangil nga kon maghisgot kitag mga indiskasyon nga sadan ang tulo, mo­ingon dayon nga yellow. Kon maghisgot og DAP, ingnon sab dayon nga naa sa oposisyon.

Ang mahinungdanon karon mao ang pagwagtang sa pa­ngurakot ug atong giuna mao ang pangurakot sa kwestyonableng pork barrel system. Angay lang mapriso ang tanang nalambigit masakop man sa oposisyon o administrasyon.

***

(Sunda @anol_cebu sa Twitter)