MI-ALMA o mireklamo karon ang mga public utility vehicles operators gumikan niining grabeng kataas sa multa sa mga violations sa trapiko labi pa sa colorum nga mga sakyanan. Mao kini ang hinungdan nga milusad og transport holiday ang mga transport organizations sa kauluhan ug ingon man dinhi sa Sugbo niadtong Huwebes nga nakaparalisar sa dagan sa transportasyon nga nakatanggong sa liboan ka mga sumasakay.
Ubos sa joint administrative order number 2014-01 sa Department of Transportation and Communications (DOTC) ug Land Transportation Office (LTO), ang mga colorum o operating without a valid transport franchise nagtangag sa mosunod nga mga multa: bus operators, P1 million; truck and vans operators, P200,000; sedan (awto) P120,000; jeepney operators, P50,000; ug motorcycle operators, P6,000. Sa mga ordinaryong violations sama sa wala magsul-ob og seat belts gikan sa P300 ngadto na sa P3,000. Nilibo ang multa sa matag depekto sa matag unit. Taas-taas ug dako-dako gyud tuod.
Katungod
Samtang atong katungod nga mopadayag sa atong mga reklamo ug yango-yango batok sa atong kagamhanan basta legal lang ug dili bayolente nga paagi. Pero ang gihimo sa taga transport group niadtong Huwebes dili maki-angayon sa riding public. Ilang gipakalitan ang publiko. Mikalit lang sila og lusad og transport strike. Unya sige sila og ingon nga rally o protesta lang ang ilang gihimo. Protesta sa ilang kagaral nga transport strike man to.
Ila unta nga gipahibawo daan ang publiko aron dili mapurwesyo ang riding public labi pa ang mga estudyante ug mga trabahante. Ilang gipasakay anang buntag ug gibiyaan pagka-hapon. Kon ila pang gipahibawo daan, makapangandam unta ang publiko.
Inay nga mo-simpatiya nila ang publiko maglagot na hinuon nila. Gobiyerno ang ilang kontra, publiko na hinoon ang gisilutan.
Korte
Pero sayon ra man ni ba nga dili na kinahanglan nga molusad pa og transport strike ang mga operators. Nganong dili man sila mosang-at og asunto ngadto sa korte aron ma-usab kining taas kaayo nga taripa sa multahan? Kon dili, mosunod lang sila sa lagda aron dili ma-multahan. Kanang colorum illegal na. Simbako og ma-disgrasya, di kwits ang kinabuhi sa mga pasahero. Unya ganahan mo ana? Ang Sunray bus mao pa lang ang nadakpan sa pagkakaron. Atong gihagit ang taga LTO 7 mga hingusgan kining maong kampaniya labi pa anang mga dahon bus companies. Naay daghan nga mga colorum nga units diha.
***
(bobby.nalzaro@yahoo.com)