NAGKANAYON si San Mig Coffee Mixers coach Tim Cone ang ilang puwersa nga nahisama sa bag-ong kampiyon sa National Basketball Association (NBA) nga mao ang San Antonio Spurs.

Gipasabot ni Cone nga sama sa Spurs, wala’y makonsiderar nga superstar sa Coffee Mixers ug tanan kinahanglang mokayod isip usa ka puwersa.

Kini maoy hinungdan nga wala’y bisan usa sa iyang mga sinaligan sama nila ni James Yap, Peter June Simon, ug Marc Pingris ang nalakip sa lig-ong mga kandidato alang sa Most Valuable Player (MVP) award sa 2014 Philippine Basketball Association.

“It’s just the way our system is set up. If you look at the Spurs, Timmy (Duncan) and maybe Tony (Parker) had a little bit of votes about the MVP because they had a great early part of the year,” pasabot ni Cone sa interbyu sa www.spin.ph

“But those guys (Duncan and Parker) don’t get any votes and San Antonio wins championships, so I just think these (Mixers players) guys would rather be holding team trophies than individual trophies.”

Sa kasamtangang nagpadayon nga PBA Governor’s Cup, ang Coffee Mixers nagtinguha nga makalangkat sa talagsaong Grandslam title.

Ang Coffee Mixers kasamtangang nag-una sa best-of-five semi-finals series, 1-0, batok sa lig-ong Talk N’ Text Tropang Texters. Ning pagsuwat, padayon pang nagkombati ang Coffee Mixers ug Tropang Texters sa Game 2 kagabii.

Kon molampos ang Coffee Mixers paglangkat og Grandslam title, seguradong dili ma­gagikan sa ilang team ang mapiling MVP.

Katapusan kining nahitabo niadtong 1989 dihang naangkon sa San Miguel Beermen ang Grandslam title apan si Benjie Paras sa Shell Turbochargers maoy nahimong MVP ug sa samang higayon, Rookie of the Year.

Ang laing napiling mga MVP sa grandslam season nagagikan sa ningkampiyon: William ‘Bogs’ Adornado (Crispa 1976), Abet Guidaben (Crispa 1983) ug Johnny Abarrientos (Alaska 1996).

“The way we go about things, I think they are fine with it (not figuring in the MVP race). They are not looking for individual goals, and yeah, it’s part of the system,” dugang ni Cone, kinsa maoy labing malampusong coach sa kasaysayan sa PBA diin 17 na ka mga korona ang iyang nalabni.

Giklaro ni Cone nga misakripisyo ang tanan niyang mga magduduwa hilabi na ang iyang mga sinaligan kay mas importante alang kanila ang makalangkat og kampiyunato kaysa sa individual awards. (ESL)